Nuk mund të konsiderohet ende çdo gjë si 100% e përfunduar, por një braktisje totale ndaj kreut aktual të Shtëpisë së Bardhë, dhe një heshtje e tij, të bën të mendosh për një tërheqje.
Presidenti Donald Trump tha të hënën se, ai i ka hapur rrugën tranzicionit për presidentin e zgjedhur Joe Biden, duke udhëzuar administratoren e agjencisë federale të Shteteve të Bashkuara, që është e ngarkuar me këtë proces, Emily Murphy, që “të bëjë atë që duhet bërë”, megjithëse do të vazhdojë me sfidat ligjore.
Administrata e Shërbimeve Qeveritare (GSA), hapi dritën jeshile zyrtarisht për tranzicionin presidencial, pak pasi shteti i Miçiganit certifikoi fitoren e demokratit Biden.
Me zhvillimet e fundit, përpjekjet e presidentit Donald Trump, për të përmbysur rezultatin e zgjedhjeve të 3 nëntorit, që kishin pësuar disa disfata, duket se po i afrohen përfundimit.
Megjithatë, presidenti vazhdoi akuzat në rrjetet sociale se, zgjedhjet ishin të manipuluara. Aktualisht, Murphy tha se, do të kalojë 6.3 milionë dollarë fonde për Biden, që të bëhet tranzicioni i pushtetit.
Por a do të thotë kjo se, Trump po e pranon humbjen?
Sipas BBC, duhet theksuar se, Trump nuk ka pse e pranon humbjen që Biden të betohet si presidenti i 46-të i SHBA.
Akti Presidencial për Tranzicionin i vitit 1963 nuk parashikon ndonjë afat të prerë brenda së cilit duhet të veprojë GSA, por agjencia ka vepruar historikisht pasi organizatat e medias parashikojnë fituesin, gjë që ndodhi më 7 nëntor.
Biden pritet të marrë detyrën më 20 janar pasi ka fituar zgjedhjet me vota elektorale të mjaftueshme për të siguruar fitoren e Kolegjit Zgjedhor. Demokrati kryeson në votën popullore me më shumë se 6 milionë vota.
Republikanët e tjerë janë distancuar gradualisht nga presidenti Trump ditët e fundit dhe kanë nxitur fillimin e procesit të tranzicionit.
/Burimi: BBC/Përktheu: GazetaReforma.com/
