Një ngjarje e rëndë ndodhi në Ishull Lezhë, ku nënkomisari Saimir Hoxha u qëllua për vdekje nga Aldi Rama, i cili më pas qëlloi veten si raporton policia, për të ndërruar jetë tek spitali i Traumës në Tiranë.
Ngjarja ka ngritur shumë pikëpyetje dhe aludime të shumta. Ditën e sotme eksperti i sigurisë, Ergys Muzhaqi në një intervistë për “Ora News” ka folur në lidhje me këtë ngjarje dhe ka thënë se në vendin tonë mungon kultura e marrjes së përgjegjësisë dhe e reagimit. Po ashtu ai ka shtuar më tej se mënyra se si Saimir Hoxha dhe tre policët ndaluan makinën ku ndodhej Aldi Rama, nuk kishte asnjë element të një operacioni policor.
“Nuk kishte asnjë element të një operacioni policor, duket sikur ka ndodhur aty për aty. Ky nuk ngjante me një operacion të organizuar. Nga të dhënat, që kemi marrë duket sikur ato kanë shkuar për një punë operative të tyre dhe pastaj ka qëlluar që kanë ndaluar makinën dhe ka ndodhur ajo që ka ndodhur. Operacioni zhvillohet me organizim, ndarje punësh.
Në situata të tilla, duhet të krijohet një kulturë reagimi dhe kultura e marrjes së përgjegjësisë. Në këtë rast dhe në shumë raste të tjera kjo kulturë neve na mungon, në lidershipin politik por edhe profesionale.
Muzhaqi tha se priste që Ministri i Brendshëm, Bledi Çuçi, të jepte dorëheqjen, pasi situata që ndodhi vrasja e policit ishte kaotike.
Muzhaqi: Në këtë rast dëgjuam një deklaratë për shtyp të Ministrit të Brendshëm ku shpreh keqardhjen, ngushëllimet dhe pastaj jepte garancinë që do luftohet lufta kundër krimit. Unë prisja që në atë moment të jepte dorëheqjen, sepse ishte një situatë tejet kaotike mënyra se si ndodhi ngjarja.”, ka thënë Muzhaqi.
