Në lidhje me vrasjen e Martin Çeços, që ndodhi në fshatin Kolanec të Maliqit më 12 qershor 2022, Gjykata e Korçës shpalli fajtorë katër persona dhe i dënoi ata me dënime të ndryshme.
Prokuroria kishte kërkuar dënimin e të akuzuarve për “Vrasje me paramendim”, duke u mbështetur në dëshmitë e dhëna nga ata vetë.
Dënimet që janë shpallur nga gjykata janë si më poshtë:
• Valter Mollaj: 25 vjet burg
• Edlir Mollaj: 23 vjet burg
• Martina Pajollari: 20 vjet burg
• Blendi Angjo: 15 vjet burg
Pavarësisht këtij vendimi, mbrojtja e të akuzuarve ka paralajmëruar apelimin. Sipas hetimeve, Martin Çeço u gjet i mbytur dhe i hedhur në një rezervuar dy ditë pas humbjes së kontakteve me familjen.
Hetuesit kanë arrestuar disa persona si të dyshuar, përfshirë kushërinjtë Valter dhe Edlir Mollaj, si dhe bariun Bledi Angjo.
Shkaku i vrasjes dyshohet të ketë qenë lidhja e viktimës me Martina Pajollarin, e cila është akuzuar për nxjerrjen e Martin Çeços në pritë.
Në mbrojtjen e të akuzuarve, ata argumentuan se nuk kishte prova të mjaftueshme që të lidhin ata me ngjarjen dhe paralajmëruan apelimin e vendimit.
Mbrojtësit e tyre theksuan se nuk janë paraqitur prova konkrete që të tregojnë se Valter dhe Edlir Mollaj kanë kryer vrasjen, dhe se materialet nga kompania “Meta”, ku dyshohej se viktima dhe autorët e dyshuar mund të kishin pasur kontakte, nuk ishin siguruar.
