UNICEF ka kritikuar planet e reja për shpërndarjen e ndihmave humanitare në Rripin e Gazës, të propozuara nga Izraeli dhe Shtetet e Bashkuara, duke paralajmëruar se ato mund të përkeqësojnë gjendjen e fëmijëve dhe familjeve palestineze.
Sipas organizatës, këto plane jo vetëm që nuk ofrojnë lehtësim, por rrezikojnë të rrisin zhvendosjet dhe vuajtjet në një zonë që tashmë ndodhet në një krizë të thellë humanitare.
Një ndër propozimet kryesore është krijimi i një Fondacioni Humanitar për Gazën, që do të shpërndajë ndihma ushqimore përmes katër “pikave të sigurta shpërndarjeje”.
Megjithatë, UNICEF e ka krahasuar këtë iniciativë me planin e paraqitur më herët nga Izraeli, duke theksuar se të dyja synojnë të kontrollojnë lëvizjen e popullsisë dhe rrezikojnë jetën e civilëve.
Zëdhënësi i UNICEF-it, James Elder, deklaroi se ndihmat nuk duhet të përdoren si mjet për zhvendosjen e popullsisë apo për krijimin e zonave të kontrolluara.
Ai paralajmëroi se një sistem i tillë do t’i vë fëmijët dhe familjet përballë një zgjedhjeje të pamundur: të zhvendosen ose të përballen me vdekjen.
Ndërkohë, dokumenti që përshkruan funksionimin e fondacionit propozon që pikat e shpërndarjes të jenë “neutrale”, dhe ambasadori amerikan në Izrael, Mike Huckabee, ka deklaruar se Izraeli nuk do të përfshihet në shpërndarjen direkte të ndihmave. Por, sipas komunitetit humanitar ndërkombëtar, çdo përfshirje indirekte e Izraelit si forcë okupatore është e papranueshme.
Elder i bëri thirrje autoriteteve izraelite të heqin bllokadën dy mujore ndaj Gazës, e cila po shkakton uri masive dhe kequshqyerje të përhapur.
“Zgjidhja është e qartë lejoni ndihmat të hyjnë lirshëm për të shpëtuar jetë”, theksoi ai. /REL
