Paraditën e sotme, banorët e fshatit Mezhgoran në Tepelenë kanë dalë sërish në protestë. Rebelimi i tyre lidhet me kundërshtimin e ndërtimit të ujësjellësit lokal qëpritet të furnizojë me ujë Mezhgoranin, Peshtanin dhe po ashtu një reasort turistik që pritet të ndërtohet në anën tjetër të Vjosës. Sipas banorëve ky projekt iu merr ujin e pijshëm për t;ja vënë në dispozicion biznesit privat që do të ndërtohet.
Banorët shprehen se nuk është marrë aprovimi i tyre për ndërtimin e këtij ujësjellësi, teksa thonë që kanë kërkuar rrugë dhe jo këtë investim që po bëhet në favor të një biznesi privat. “Janë duke na marrë ujin pa na pyetur fare. Duan zhvendosjen e fshatit. Kemi kërkuar të na bëjnë rrugën jo ujësjellësin. Fshati e kontrollon vetë ujin si mundet me investime private dhe burimi ska ujë as për ne jo më të furnizojë resorte”, shprehet një banor.
Fshati me rreth 300 banorë i vendosur në një lartësi prej 730 m mbi nivelin e detit, jeton kryesisht me blegtori. Është kjo një nga arsyet pse banorët kundërshtojnë ndërtimin e këtij ujësjellësi, pasi krijohet problemi se ku do të pijnë ujë bagëtitë, në një siyuatë ku burimi i ujit gjatë verës thahet plotësisht.
“Fshati jeton me blegtori. Ku do pijnë bagëtitë? Kemi 2500 dele e dhi përveç lopëve. Si kanë menduar që do jetojmë pa ujë? Askush nuk është dakord. Burimi thahet komplet në verë e nuk përmbush dot nevojat tona. Nuk do ti lejojmë”, thotë një tjetër. “Po na hoqën dhe ujin të na thonë si të jetojmë. Ne nuk kemi parë asnjë projekt nuk na u morr asnjë mendim. Nuk dimë fare ç’bëhet vetëm duam zgjidhje”, tregon një banore.
Ditën e djeshme banorët bllokuan rrugën nacionale pranë urës së Peshtanit duke ndaluar kalimin e mjeteve të rënda dhe më pas janë konfliktuar fizikisht me policinë. Ndërkohë sot u desh ndërhyrja e forcave të shumta policore për të garantuar fillimin e punimeve.
