Seanca e parë e rregullt pranverore në Kuvendin e Serbisë ka filluar, por situata është tensionuar për shkak të refuzimit të kërkesave të opozitës për futjen e dy pikave në rendin e ditës.
Në këtë seancë duhej të konfirmohej dorëheqja e kryeministrit Milosh Vuçeviç.
Një atmosferë kaotike është krijuar në Kuvend, ku është hedhur gaz lotsjellës dhe ka pasur përplasje fizike mes deputetëve të pozitës dhe opozitës.
Incidenti ndodhi të martën, kur deputetët opozitarë aktivizuan mjete piroteknike, pas miratimit të rendit të ditës nga koalicioni qeverisës, i cili u kundërshtua nga opozita. Ata iu afruan tavolinës së kryetarit, aktivizuan bomba me tym dhe shpalosën një pankartë me mbishkrimin “Serbia po ngrihet për të rrëzuar regjimin”.
Tymi nga mjetet piroteknike mbuloi të gjithë sallën dhe u shtri edhe në korridoret e kuvendit. Qeveria miratoi paraprakisht një rend dite prej 62 pikash, përfshirë edhe ndryshime në Ligjin për Arsimin e Lartë, një kërkesë e studentëve që kanë protestuar që pas tragjedisë në Novi Sad në nëntor të vitit të kaluar.
