Autoritetet gjermane, përmes një e-maili, kanë informuar Policinë e Tiranës se 49-vjeçari Fati Alwan, i cili ka vrarë me thikë 24-vjeçaren Rayyan Alwan, janë baba dhe bijë.
Sipas burimeve nga grupi hetimor, kjo lidhje është bazuar në kërkesën për azil të tyre në Gjermani dhe jo në analiza ADN-je, prandaj lidhja mes tyre mbetet ende e pasqaruar. 49-vjeçari vazhdon të jetë në kërkim ndërkombëtar.
Autoritetet shqiptare kanë kërkuar nga homologët gjermanë që të kontaktojnë familjarët dhe t’i kërkojnë të tërheqin trupin e pajetë të Rayyan Alwan nga morgu, por deri tani nuk ka pasur asnjë interesim nga ana e tyre.
Hetuesit shqiptarë po presin gjithashtu ekspertizën mjeko-ligjore për të përcaktuar kohën e saktë të vrasjes. Fati dhe Rayyan Alwan kishin mbërritur në Shqipëri më 19 shkurt, dhe 49-vjeçari u prezantua si turist që udhëtonte me partneren e tij.
Biletat ishin prenotuar disa orë para udhëtimit, dhe sapo mbërritën, ata shkuan në një apartament të marrë me qira në rrugën “Gjon Muzaka”. Në natën e parë qëndruan në katin e parë të një ndërtese trekatëshe, dhe më pas, më 20 shkurt, u zhvendosën në katin e tretë, aty ku ndodhi krimi.
Hetuesit dyshojnë se vrasja mund të ketë ndodhur më 20 ose 21 shkurt, pasi kamerat e sigurisë nuk tregojnë se vajza ka dalë jashtë shtëpisë gjatë këtyre dy ditëve.
Më 22 shkurt, në orën 5 të mëngjesit, Fati Alwan është larguar nga apartamenti dhe ka udhëtuar drejt Greqisë përmes Rinasit.
Ngjarja u zbulua më 27 shkurt. Mediat holandeze kanë raportuar gjithashtu se Rayyan Alwan kishte denoncuar të atin për dhunë, pasi ai nuk priste që ajo të jetonte në mënyrë të pavarur, kundër zakoneve të fesë islame.
