Dy persona u vranë dhe tre të tjerë u plagosën në një incident të rëndë me armë zjarri në një lokal me pronarë shqiptarë në Saint-Galles të Brukselit. Ngjarja, që mendohet të jetë e lidhur me trafikun e drogës, ndodhi në orët e para të mëngjesit, midis orës 01:00 dhe 02:00, në “Rue de l’Argonne”, afër Gare du Midi.
Sipas dëshmitarëve, autorët e të shtënave përdorën kallashnikovë dhe qëlluan mbi klientët që ndodheshin në tarracën e lokalit. Dy viktimat janë një burrë dhe një grua, ndërsa tre të plagosurit janë transportuar në spital, ku dy prej tyre ndodhen në gjendje kritike.
Një burim i mirëinformuar ka bërë të ditur se autorët e sulmit kanë përdorur një skuter për të arritur në vendin e ngjarjes. Hetimet paraprake sugjerojnë se sulmi kishte si shënjestër kafenenë dhe jo klientët specifikë, duke bërë që viktimat të ishin aksidentale.
Numri i lartë i viktimave e bën këtë një nga atentatet më vdekjeprurëse të viteve të fundit në Bruksel. Motivacionet e sulmit mbeten ende të paqarta, megjithëse dyshohet se është i lidhur me trafikun e drogës dhe se pronarët shqiptarë të kafenesë mund të kenë qenë objektivi kryesor.
Brukseli, veçanërisht zona e Gare du Midi, ka qenë shpesh e prekur nga dhuna e lidhur me trafikun e drogës. Në vitin 2023, dhuna midis bandave rivale për kontrollin e territorit la 7 të vdekur dhe 130 të plagosur rëndë. Ky incident është një kujtesë e hidhur e vazhdimësisë së kësaj dhune në qytet.
