Policia e Shtetit prej 4 javësh ka nisur publikimin e emrave dhe fotografive të 50 personave më të kërkuar nga autoritetet shqiptare, të akuzuar për një sërë veprash penale, si: vrasje, rrëmbim, rrahje, grabitje me dhunë, e armëmbajtje pa leje etj.
Ditën e sotme janë publikuar emrat e 3 personave të radhës, të shpallur në kërkim për vepra të ndryshme penale.
Dritan(Gramos) Rexhepi
Rexhepi më 6 janar 1999, ka vrarë me armë zjarri dy shtetas në Krujë, duke u dënuar me 25 vjet burg, nga Gjykata e Apelit për Krime të Rënda Tiranë, për veprat penale “Vrasja me dashje për shkak të cilësive të veçanta të viktimës”, “Plagosja e rëndë, me pasojë vdekjen” në bashkëpunim dhe “Armëmbajtja pa leje”.
Rexhepi po ashtu është lakuar edhe për urdhërimin e rrëmbimit dhe vrasjes së Jan Prengës dhe aktualisht ndodhet në burgun e Ekuadorit.
Bledar Mneri
Mneri ka vrarë shtetasin me iniciale V.B. në Tiranë, ngjarje kjo e ndodhur në vitin 2015.
Ai është dënuar nga Gjykata e Shkallës së Parë Tiranë me 25 vjet burg, për veprat penale “Vrasja me paramendim” dhe “Armëmbajtja pa leje”.
Gazment Nebiu
Ka qenë pjesëtar i bandës së armatosur “Banda e Kakamit” dhe është dënuar nga Gjykata e Shkallës së Parë për Krime të Rënda e ka dënuar me 25 vjet burgim.
Ai akuzohet për veprat penale “Vrasja me paramendim” e kryer në bashkëpunim, “Krijimi i bandës së armatosur”, “Vrasja me paramendim, e kryer në bashkëpunim, në kuadër të bandës së armatosur” (3 herë), “Vjedhja me dhunë, e kryer në bashkëpunim, në kuadër të bandës së armatosur” dhe “Armëmbajtja pa leje, në kuadrin e bandës së armatosur”.
