Spanjë voton sot për zgjedhjet e përgjithshme dhe zgjedhjen e senatorëve të rinj. Për të qenë pjesë e parlamentit në votime marrin pjesë parti tradicionale, socialistët e kryeministrit Pedro Sanchez, nacionalistët baskë e katalanas dhe ekstremi i djathtë që mund të bëhet pjesë për herë të parë e parlamentit spanjoll.
Të drejtën e votës e kanë 36.893.976 qytetarë për zgjedhjen e 350 deputetëve të rinj dhe 208 senatorëve.
Me votimin e sotëm spanjollët zgjedhin legjislaturën e 13 në 42 vite demokraci.
Qendrat e votimit janë hapur në orën 09:00 të mëngjesit dhe mbyllen në orën 20:00 të darkës. Sipas analistëve në Spanjë asnjëra prej forcave politike nuk mund të sigurojë votat e nevojshme për të qeverisur dhe pritet që të formohen koalicionet e nevojshme që do t’i japin spanjollëve dhe qeverinë e re.
Fushata e partive politike ishte e tensionuar, e fokusuar jo në ekonomi por në luftën për identitet dhe vlera. Analistët vlerësojnë se do të duhen shumë muaj ndërmjetësim për të arritur një marrëveshje koalicioni. Ky zhvillim i mundshëm do të zgjerojë pasiguritë politike që prekin edhe Europën. Të paktën 5 parti të spektrit politik kanë një shans që të jenë në qeveri.
Në bazë të sondazheve, asnjë forcë politike nuk do të sigurojë maxhorancën; Partia Socialiste e Kryeministrit Pedro Sanchez shikohet si favorite dhe mund të marrë numrin më të lartë të deputetëve. Kjo është hera e tretë që Spanja mban zgjedhje të përgjithshme në një hark kohor prej 4 vitesh.
