Sot, në orët e para të mëngjesit të së dielës (30 mars), akrepat e orës u zhvendosën 60 minuta përpara në kuadër të kalimit në orën verore.
Ky ndryshim nënkupton që do të humbasim një orë gjumë, por gjithashtu do të përfitojmë më shumë dritë natyrore gjatë ditës. Ora verore do të mbetet në fuqi deri në të dielën e fundit të tetorit, kur akrepat do të kthehen një orë pas.
Si u krijua koncepti i orës verore?
Ideja për ndryshimin e orës u propozua për herë të parë në vitin 1907 nga anglezi William Willett, i cili argumentoi se njerëzit duhet të shfrytëzonin më mirë orët me dritë gjatë mëngjeseve të verës. Ai sugjeroi një kalendar progresiv ku ora do të zhvendosej për 80 minuta në katër hapa gjatë prillit dhe do të rikthehej në të njëjtën mënyrë në shtator. Megjithëse Willett e promovoi me këmbëngulje këtë ide, ai nuk arriti ta shihte të zbatuar, pasi vdiq në vitin 1915.
Ndryshimi i orës u zbatua për herë të parë nga Gjermania më 30 prill 1916, kur akrepat u zhvendosën një orë përpara, për të kursyer energji gjatë Luftës së Parë Botërore. Pak muaj më vonë, më 21 maj 1916, edhe Britania ndoqi të njëjtën praktikë, duke miratuar ligjin për “Kohën Verore”.
Ndër vite, ndërrimi i orës nuk ka qenë gjithmonë i njëjtë. Përveç zhvendosjes standarde njëorëshe, disa vende kanë eksperimentuar me ndryshime më të vogla ose më të mëdha, si zhvendosja për 20, 30, 40 apo edhe 120 minuta. Për shembull, gjatë viteve ’40, disa shtete aplikuan ndryshime dyorëshe, ndërsa Zelanda e Re dhe Australia në periudha të caktuara përdorën zhvendosje prej 30 minutash.
Prej vitit 1981, sistemi i ndërrimit të orës është standardizuar në shumicën e vendeve evropiane, ku zhvendosja ndodh 60 minuta përpara në pranverë dhe një orë pas në vjeshtë. Ky rregullim bëhet gjithmonë të dielën e fundit të marsit dhe të dielën e fundit të tetorit, duke synuar shfrytëzimin më efikas të dritës së diellit dhe kursimin e energjisë elektrike.
Pas ekuinoksit pranveror, dita vazhdon të zgjatet, duke arritur kulmin më 22 qershor, kur dielli qëndron mbi horizont për rreth 15 orë, ndërsa nata zgjat vetëm 9 orë.
