SKANDALI/ Paratë për armë e pajisje ushtarake dyshohet se përfunduan te kuajt e Agasit në Equos Resort, SPAK thellon hetimet për TIMAK-KAYO

Hetimet për kompanitë e përfshira në industrinë shqiptare të mbrojtjes po marrin një tjetër drejtim, këtë herë duke ndjekur destinacionin e parave. Në qendër janë TIMAK, partneriteti me kompaninë shtetërore KAYO dhe bizneset e lidhura me Arjeta Pucën dhe Ron Yeffet.

Sipas të dhënave të publikuara mbi hetimin, SPAK po verifikon dyshimet se para të përfituara nga aktiviteti i TIMAK dhe kontratat në sektorin e mbrojtjes mund të kenë përfunduar në një aktivitet krejt tjetër: kuaj dhe hipizëm.

Pikërisht këtu shfaqet “Timak Horse Club”, biznes me seli pranë Equos Resort në Tiranë. Të dhënat e regjistrit tregtar tregojnë se 70% e tij zotërohet nga TIMAK, kompania ku Arjeta Puca zotëron 51% dhe Ron Yeffet 49%.

Lidhja bëhet edhe më e fortë për shkak të vendndodhjes. Equos Resort është kompleksi i lidhur me biznesmenin Ergys Agasi dhe ndodhet aktualisht nën sekuestro në kuadër të hetimeve të SPAK për dosjen e AKSHI-t.

Kështu, dy dosje që në pamje të parë lidhen me sektorë krejt të ndryshëm, AKSHI-n dhe Mbrojtjen, prekin tashmë të njëjtën pikë: Equos.

SPAK ka sekuestruar më herët kontrata dhe dokumentacion në Ministrinë e Mbrojtjes dhe në TIMAK, ndërsa hetimet po zhvillohen për dyshime që lidhen me pastrimin e parave, shpërdorimin e detyrës dhe favorizimin në tendera e gara publike. Puca dhe Yeffet pritet gjithashtu të merren në pyetje nga prokurorët.

Pesha financiare e historisë është e konsiderueshme. TIMAK është partneri privat i kompanisë shtetërore KAYO në “TIMAK Defence”, shoqërinë e krijuar në gusht 2025 për aktivitet në industrinë e mbrojtjes. Sipas dokumentacionit tregtar, TIMAK zotëron 80% të kompanisë, ndërsa KAYO 20%.

Ndërkohë, të dhënat e publikuara mbi pagesat nga Thesari tregojnë se TIMAK Defence ka përfituar dhjetëra milionë euro nga buxheti i shtetit brenda një periudhe relativisht të shkurtër nga krijimi i saj.

Pikërisht për këtë arsye hetimi për destinacionin e parave merr një tjetër peshë. SPAK nuk po përballet vetëm me pyetjen se si janë dhënë kontratat e Mbrojtjes, por po verifikon edhe se ku kanë përfunduar fondet dhe si janë përdorur ato më pas.

Nëse dyshimet e raportuara provohen nga hetimi, zinxhiri do të ishte veçanërisht problematik: para publike të destinuara për industrinë e mbrojtjes, një kompani private në ortakëri me shtetin dhe më pas investime në një biznes hipizmi të vendosur pranë një resorti që sot është vetë nën sekuestro të SPAK.

Për momentin kjo mbetet një pistë nën hetim dhe nuk ka një konkluzion publik të SPAK që të provojë se fondet e Mbrojtjes janë transferuar në mënyrë të paligjshme drejt “Timak Horse Club”.

Por zgjerimi i verifikimeve tregon se dosja TIMAK–KAYO nuk po kufizohet më vetëm te mënyra se si janë dhënë kontratat. Hetuesit po ndjekin edhe gjurmën e parave. Dhe kjo gjurmë i ka çuar tashmë deri te biznesi i kuajve pranë Equos Resort.