Kanë kaluar dy ditë që nga rrjedhja e të dhënave personale të më shumë se 630 mijë qytetarëve shqiptarë dhe në vend po vijon ende qarkullimi i ID, numrit të telefonit, dhe rrogave të shtetasve shqiptarë.
Lidhur me këtë skandal, të përmasave të mëdha dhe shumë shqetësues për privatësinë e shqiptarëve, ka reaguar Prokuroria e cila ka nisur hetimet për ngjarjen në fjalë. Prokuroria e Tiranës ka nisur nga puna për të zbuluar se kush fshihet pas këtij skandali.
Gjatë ditës së sotme, institucioni i drejtësisë, ka marrë në pyetje disa ekspertë të IT në Drejtorinë e Tatimeve dhe në Institutin e Sigurimeve Shoqërore. Prokuroria nuk ka ndaluar me kaq. Bëhet e ditur se organi i Akuzës ka marrë në pyetje edhe ekspertë në Agjencinë Kombëtare të Shoqërisë së Informacionit.
Nga informacionet paraprake, mësohet se Prokuroria ka pyetur 14 ekspertë IT, të cilët kanë pasur akses në serverin e pagave të qytetarëve shqiptarë. Gjithashtu mësohet se Prokuroria e Tiranës, përveç marrjes në pyetje të ekspertëve, po kryen ekspertim edhe te kompjuterët e specialistëve të Tatimeve.
Kujtojmë se para dy ditësh në rrjet nisën të qarkullojnë të dhënat personale të shqiptarëve, si rroga, vendi i punës dhe ID, teksa një ditë më parë ‘gropa’ e skandalit u thellua me publikimin edhe të numrave të telefonit të qytetarëve.
