Gazetari Artan Hoxha ka komentuar çështjen e Belinda Balluku gjatë një interviste në emisionin Kjo Javë në News24, duke e cilësuar situatën si të paprecedentë për Shqipërinë.
Sipas Hoxhës, Shqipëria është i vetmi vend që ka një zv.kryeministre e cila nuk kalon dot kufirin shtetëror. Ai theksoi se kjo gjendje është vendosur nga Gjykata, ndërsa pjesa tjetër e procesit, sipas tij, është mbajtur peng nga kryeministri përmes Parlamentit.
Në analizën e tij, Hoxha përdori një krahasim simbolik, duke thënë se Balluku është bërë si Kalaja e Rozafës. “Ndërtojnë ditën dhe prishin natën. SPAK mundohet ta rrëzojë, Rama punon ditën të ndërtojë kalanë dhe duket sikur SPAK shkon i heq tullat që ka vënë gjatë ditës. Situata është e trishtë”, u shpreh ai.
Gazetari shtoi se Shqipëria sot ka një zv.kryeministër që nuk kalon dot kufirin shtetëror dhe se këtë situatë e ka vendosur Gjykata, ndërsa sipas tij kryeministri Edi Rama ka ndërhyrë përmes Parlamentit për ta mbajtur procesin të bllokuar.
Duke folur për rolin e SPAK, Hoxha deklaroi se që në fillim Prokuroria e Posaçme nuk duhet të kishte ndjekur rrugën që ndoqi me Ballukun, por duhet të ishte drejtuar drejtpërdrejt Parlamentit. “SPAK që në fillim nuk duhet të kishte shkuar tek Balluku në rrugën që ndodhi, por duhet të shkonte te parlamenti dhe t’i lehej në derë Parlamentit”, tha ai.
