Siguria ushqimore është kthyer padyshim në një nga problemet më shqetësuese dhe kjo për shkak jo vetëm të pesticideve dhe hormoneve të përdorura, por edhe të allçisë e pluhurit të tullës.
Pikërisht për këtë problem ka reaguar ditën e sotme gjatë mbledhjes së grupit parlamentar të Partisë Socialiste edhe kryeministri Rama.
Rama gjatë fjalës së tij ka thënë se tashmë gjithçka do të sanksionohet në ligj dhe nuk do të ketë vetëm heqje të licencës së aktivitetit, por edhe dënime me burg për të gjithë ata që kërcënojnë shëndetin e qytetarëve.
“Ndërkohë që Po, kodi ka nevojë për disa ndryshime në aspekte të tjera për mbarëvajtjen e jetës së vendit. Duke nisur nga siguria ushqimore, kemi bërë jo pak progres. Produktet tona bujqësore, ndryshe nga cfarë del ne ekran për të bërë sensacion, janë plotësisht të shëndetshme. Asnjë kamion, në 300 mijë ton, nuk është kthyer për shkak të cënimit të standardeve europiane, por ka fatkeqësisht individë edhe subjekte që kryejnë krime kundër shëndetit të njeriut, ia kanë hedhur 30 vjet me gjoba që nuk janë asgjë krahasuar me fitimin e tyre
Këtyre forcave të së keqes që guxojnë të kërcënojnë shëndetin e fëmijëve tanë dhe të gjithë atyre që në këtë vend konsumojnë ushqim, duhet t’u rezervojmë ndëshkimin më shembullor, të heqjes së lirisë së aktivitetit, dhe individuale”, ka thënë kryeministri.
Po kaq i fortë ka qenë paralajmërimi edhe për prodhuesit dhe tregtarët që tregtojnë produkte vendase.
“Dua t’i referohem disa neneve për sigurinë ushqimore, importimi, prodhimi, ruajtja, prodhimi, shitja apo vendosja në qarkullim e pijeve ushqimeve, barnave, futja e kimikateve do të dënohet me burg. E njëjta gjë për tregtimin e produkteve jashtë afatit. Kjo është një lojë që vazhdon prej 30 vitesh, që afatet e përdorimit të prodhimeve ushqimore shkelen. S’ja ka borxh asnjë familje kësaj shumice që të rrijë dhe bëjë sehir, është një vepër që dënohet me 10 vjet burg”,- shtoi ai.
