Mëngjesin e sotëm, në emisionin “Koha për t’u zgjuar”, avokati Erald Aga u ndal te problematika e shpronësimeve në Shqipëri, duke theksuar se ndryshimet ligjore të bëra ndër vite janë në kundërshtim me Kushtetutën dhe duhej të ishin kundërshtuar.
Sipas avokatit, ligji për shpronësimet, miratuar në vitin 1999, ka pësuar disa ndryshime në vitet 2016 dhe 2020 që, sipas tij, kanë krijuar pasoja të padrejta për qytetarët.
“Ndryshimet ligjore nuk duheshin bërë, pasi janë antikushtetuese. Shteti ka të drejtën të shpronësojë për interes publik, por askush nga të shpronësuarit nuk ka marrë vlerën e plotë të pronës. E vetmja përjashtim është Lulzim Basha, i cili e çoi çështjen në Strasburg dhe përfitoi brenda tre vitesh. Ndërkohë, qytetarët e tjerë janë shpronësuar me shifra qesharake,” u shpreh Aga.
Një nga ndryshimet më të diskutueshme, sipas tij, është futja e mundësisë që shpronësimet të kryhen nga kompani private. Ai e cilësoi këtë një koncept skandaloz, duke shpjeguar se tashmë privatët mund të hyjnë në marrëveshje me shtetin për të shpronësuar qytetarët dhe ndërtuar pallate. “Këto ndryshime nuk duhej të ishin miratuar”, theksoi ai.
Një tjetër element shqetësues është koncepti i shpronësimit për ndërtesat e vjetra e të degraduara.
Sipas avokatit, ky ndryshim ligjor, futur pas tërmetit të vitit 2019, lejon shembjen e banesave mbi 50 vjet për të ndërtuar pallate, ku pronarët marrin vetëm një apartament me të njëjtën sipërfaqe si banesa e vjetër.
“Audituesi vlerëson banesën e degraduar dhe vendos për shembjen. Në fund, qytetari përfiton vetëm një apartament po aq të madh sa kishte më parë, pa asnjë vlerë shtesë,” sqaroi Aga.
