Shkodër/ Tentoi të ndihmojë 8 të huaj për të kaluar kufirin, arrestohet 44-vjeçari

Në qytetin e  Shkodrës, një 44-vjeçar është vënë në prangat e Policisë së Shtetit, për shkak se tentoi t’i jepte ndihmë 8 shtetasve të huaj, për kalim të paligjshëm të kufirit. I arrestuari është shtetasi me inicialet G. H., 44-vjeç, banues në Tiranë. Ky shtetas, është kapur në aksin rrugor Shkodër–Hani Hotit, duke transportuar me një mjet tip “Fiat”, 8 shtetas të huaj drejt Malit të Zi, me destinacion final vendet e BE-së.

Njoftimi i policisë:

Finalizohet operacioni policor i koduar “Porosia”. Tentoi t’i jepte ndihmë 8 shtetasve të huaj, për kalim të paligjshëm të kufirit, arrestohet në flagrancë 44-vjeçari.

Nga strukturat e Seksionit për Hetimin e Trafiqeve dhe Narkotikëve në DVP Shkodër, në zbatim të planit të masave “Për goditjen dhe parandalimin e emigracionit të paligjshëm”, pas një pune të mirorganizuar u finalizua operacioni policor i koduar “Porosia”. 

Si rezultat i këtij operacioni është bërë arrestimi në flagrancë i shtetasit G. H., 44 vjeç, banues në Tiranë.

Ky shtetas është kapur në aksin rrugor Shkodër – Hani Hotit, duke transportuar me një mjet tip “Fiat”, 8 shtetas të huaj nga vendet e treta, drejt Malit të Zi, me destinacion final vendet e BE-së.  Materialet iu referuan Prokurorisë së Rrethit Gjyqësor Shkodër, për veprën penale “Ndihma për kalim të paligjshëm të kufijve”.