SHBA-ja kryen sulme në Jemen, 20 viktima

Ushtria amerikane ka njoftuar se ka ndërmarrë një sulm ajror të drejtpërdrejtë ndaj një porti kyç të karburanteve në Jemen, që kontrollohej nga rebelët Huthi.

Objektivi ishte porti i Ras Isa, një nyje strategjike për furnizimin me karburant të forcave rebele të mbështetura nga Irani.

Sipas Komandës Qendrore të ushtrisë amerikane (Centcom), operacioni kishte si synim dobësimin e burimeve financiare të rebelëve, të cilët përfitojnë ndjeshëm nga tregtia e karburanteve.

Në deklaratën e saj, Centcom thekson se sulmi ishte i synuar vetëm ndaj kapaciteteve ekonomike të rebelëve, duke shtuar se “nuk kishte për qëllim të dëmtonte popullin e Jemenit, por të ndihmonte çlirimin e tij nga shtypja e Huthive”.

Nga ana tjetër, rebelët Huthi raportojnë për një numër të lartë viktimash si pasojë e sulmit. Sipas tyre, të paktën 20 persona kanë humbur jetën dhe mbi 50 të tjerë janë plagosur.

Kjo ndërhyrje vjen në kuadër të një fushate më të gjerë ajrore të SHBA-së, e cila nisi më 15 mars me urdhër të presidentit Donald Trump. Qëllimi kryesor është ndalimi i sulmeve të rebelëve ndaj anijeve tregtare dhe atyre ushtarake në Detin e Kuq dhe Gjirin e Adenit.

Veprimet e rebelëve kanë sjellë pasoja të mëdha në lëvizjen ndërkombëtare të mallrave, duke rrezikuar sigurinë në një nga korridoret më të rëndësishme detare Kanalin e Suezit.

Për shkak të këtyre sulmeve, shumë kompani janë detyruar të devijojnë rrugët detare, duke sjellë kosto të shtuara dhe vonesa në tregtinë globale.