Kreu i Partisë Demokratike, Lulzim Basha,ka bërë apel ndaj qeverisë që të merren masa urgjente për testimin masiv.
Në një lidhje online me studion “Ora News”, Basha tha se sakrifica për të qëndruar në shtëpi është e kotë, nëse nuk identifikohen të gjithë ata që janë prekur.
Basha tha se më të rrezikuarit nga epidemia janë bluzat e bardha, forcat e rendit, ushtria, personeli i shërbimit administrativ dhe punonjësit e ndërmarrjeve private.
“Ne jemi tek gjysma e testeve të Maqedonisë se Veriut. Testimi, testimi, nuk është vënë kot theksi sepse e gjithë sakrifika për të qëndruar në shtëpi dhe të izoluar mund të na shkojë kot nëse nuk arrijmë të identifikojmë të gjithë ata që janë prekur apo infektuar bartës të virusit dhe nuk ka rrugë tjetër. Mungesa e testimit masivi po penalizon të gjithë shqiptarët. Kërkesa nr 1 që kam sot është urgjentisht të merren masa për të shtrirë testimin masivisht. Të bëhet mobilizimi I të gjithë resurseve. Ata më të rrezikuarit, personeli mjekësor, personeli I forcave të armatosura, forcave të rendit, personeli I shërbimit administrative, dhe punonjës të ndërmarrjeve private që janë në kontkat me njerëzit ti nënshtrohen testimit. Do të sillte izolimin dhe përpjekjen për të prerë zinxhirin e infektimit. Nëse ne qëndrojmë në shtëpi është gjysma e punës, nëse të infektuarit nuk izolohen dhe brenda familjes apo në rastet kur kanë nevojë për ndihmë mjekësore nuk mjekohen kjo sakrificë shkon dëm,“- tha Basha.
Sipas tij, Shqipëria është vonë me testimin, duke marrë shkas edhe nga 12 rastet e identifikuara ditën e djeshme në Shkodër.
“Ajo që ndodhi dje në Shkodër është këmbanë alarmi. 12 të infektuar për 15 të testuar. Kjo do të thotë që Shqipëria është shumë vonë me testimin. Shifrat që janë tani janë vetëm maja e ajsbergut. Së dyti të përshpejtohet marrja masave per te siguruar pajisjet mbrojtëse për mjekët dhe të kemi mjaftueshëm kapacitet për shërimin e pacientëve,”– shtoi Basha më tej.
Shumë vende të botës kanë zgjedhur testimin masiv si një mënyrë për të frenuar përhapjen e COVID-19, mes të cilëve edhe Koreja e Jugut.
Sipas ekspertëve të shëndetit në Korenë e Jugut, kurba e të infektuarve në fillim të marsit nisi të pakësohej nga dita në ditë dhe kjo pa u dashur të merren masa drastike si ato në Kinë.
Në nisje të epidemisë, autoritetet shqiptare siguruan popullatën se sistemi ynë shëndetësor mund të përballonte testimin masiv të popullsisë, e megjithatë një gjë e tillë nuk ka ndodhur
Shkak për këtë shifër të ulët të testimit mendohet të jetë çmimi i kiteve testuese, që sipas dr. Silva Bino nga Instituti i Shëndetit Publik, është 15.000 lekë/kit dhe shpenzimet mbulohen nga shteti.
Dy ditë më parë, Prokuroria nisi një hetim ndaj Spitalit Amerikan, pas një kallzimi të bërë nga Policia e Shtetit, për mashtrimet që subjekti po u bënte qytetarëve shqiptarë me testet për COVID-19.
Testet për COVID-19 deri në 400 euro! Spitali Amerikan nën hetim për ngjallje paniku dhe kontrabandë
Vetë drejtori i Spitalit Amerikan, Klodjan Allajbeu zgjodhi të tregohej i painformuar kur tha se nuk ishte në dijeni që ligji kërkonte që testimet të ishin falas.
Ndërkohë burime për “Iconstyle.al”, bëjnë me dije se testimet në Spitalin Amerikan jo vetëm që kishin nisur, por kushtonin 300-400 euro.
Agjencia Kombëtare e Barnave ndërkohë sqaroi në një njoftim për mediat, se vetëm laboratori i ISHP është i lecensuar për të kryer teste.
Numri i të prekurve nga COVID-19 në vendin tonë ka shkuar në 304, në mesin e të cilëve 16 viktima dhe 89 të shëruar.
Gjatë 24 orëve të fundit janë kryer 112 teste nga të cilat 27 rezultuan pozitiv.
Në spitalin Infektiv ndërkohë ndodhen 73 persona, 7 prej të cilëve në terapi intensive, ku dy janë intubuar.
