Bashkia e Durrësit miratoi pak ditë më parë bonusin e qirasë për 660 familje.
Mirëpo pavarësisht kësaj, qytetarët e kanë të vështirë të gjejnë një shtëpi me qira.
Kjo për shkak se qiratë janë rritur dhe vlera e tyre ka shkuar sa dyfishi i bonusit të bashkisë.
“Monitor” ka sjellë rasti e dy banorëve, që u përballën me çmimet e larta të qirave.
Shtëpia e Anilës, e cila banonte pranë pallatit të sportit u shpall e pabanueshme.
Ajo u përball me çmime shumë të larta, ku për një apartament 1+1, duhet të paguante një qira prej 300 eurosh.
Me ndarjet që ka bërë bashkia, Anila përfiton 200 mijë lekë bonus, i cili nuk mjafton për pagesën e qirasë.
Një rast tjetër është ai i Agimit, i cili për një banesë 2+1, duhet të paguajë 400 euro.
Shtëpia ndodhet pranë pallatit të sportit, zonë kjo ku përpara tërmetit qiraja nuk i kalonte 200 mijë lekë të vjetra.
Agjentët e pasurive të paluajtshme, konfirmojnë se pas tërmetit, ka pasur një shtim të kërkesave për shtëpi me qira.
Kjo ka bërë që qiratë të rriten artificialisht dhe pronarët i kanë hequr shtëpitë e tyre nga katalogjet e agjencive.
Zona më e lirë në Durrës është Këneta, me çmime nga 12 mijë-18 mijë lekë në muaj, duke vazhduar më pas me 200 mijë lekë afër spitalit e të stadium.
Kurse në zonën e qendrës çmimi i qirave shkon deri në 25 mijë lekë, duke përfunduar në Vollga ku gjenden çmime që variojnë nga 250-400 euro.
Vollga dhe kodra e Vilës së Zogut, edhe për shkak të terrenit, kanë qenë zonat më pak të prekura nga tërmeti.
Gjithashtu në Durrës po vihet re tendenca për të marrë shtëpi jo më lart se kati i 4, ndërsa janë rritur kërkesat për shtëpi private.
