Rrëmbimi dhe vrasja e Eglant Koçit për 700 mijë euro, Apeli liron Enea Zyferin

Gjykata e Apelit ka zbutur masën e sigurisë për Enea Zyferin, 25-vjeçarin e dyshuar për përkrahje të autorit të krimit në dosjen e rrëmbimit dhe vrasjes së Eglant Koçit. Apeli ka zëvendësuar masën “arrest në burg” me “arrest në shtëpi”, ndërsa Armand Shakaj, i dyshuari kryesor për krimin, vijon të jetë në arrati.
Zyferi, i cili punonte si kamarier në lokalin e Shakajt në Tiranë, mbetet nën hetim. Ai ka deklaruar se ditën e ngjarjes e kishte parë 34-vjeçarin Eglant Koçi të hynte në lokal, por jo të dilte prej tij.
Pamjet e kamerave të sigurisë, të administruara nga hetuesit, tregojnë Armand Shakajn duke futur një qese të zezë në automjetin e tij. Hetuesit dyshojnë se brenda saj mund të ketë qenë trupi i pajetë i viktimës.
Armand Shakaj, 41 vjeç, është në kërkim që prej 4 qershorit, i dyshuar për rrëmbimin, vrasjen dhe fshehjen e trupit të Eglant Koçit. Trupi i 34-vjeçarit u gjet më 18 qershor në një humnerë, në një zonë të thellë në kufirin mes Tiranës dhe Elbasanit.
Hetimet janë përqendruar edhe në ambientet e biznesit të Shakajt, pranë shkollës “Ismail Qemali” në Tiranë. Në kompjuterët e sekuestruar në zyrën mbi lokal, policia ka zbuluar të dhëna për llogari kriptomonedhash, duke ngritur dyshime se krimi mund të ketë pasur motive financiare.
Në qendër të pistës hetimore janë rreth 700 mijë euro në kriptomonedha. Sipas të dhënave të atribuuara burimeve policore, Koçi dyshohet se administronte në portofolin e tij elektronik këtë shumë për llogari të një personi tjetër. Transaksioni i fundit i identifikuar raportohet të ketë qenë 160 mijë euro.
Hetuesit po verifikojnë gjithashtu lidhjet e viktimës me një grup që dyshohet se merrej me kriptomonedha dhe aktivitete call center-ash.
Dëshmia e një kamerieri ka ndihmuar në rindërtimin e ngjarjes. Ai ka deklaruar se kishte parë Shakajn të dilte nga zyra me qese të zeza. Hetuesit dyshojnë se viktima mund të jetë vrarë në ambientet e biznesit dhe më pas trupi i tij të jetë transportuar.
Nga veprimet hetimore ka rezultuar se autori i dyshuar ka lëvizur edhe motomjetin e Koçit nga vendi ku ishte parkuar fillimisht. Ndërkohë, automjeti që dyshohet se është përdorur për transportimin e viktimës është gjetur dhe sekuestruar.
Pavarësisht provave të administruara dhe dyshimeve të ngritura për motivin financiar, Armand Shakaj mbetet ende i pakapur, ndërsa Enea Zyferi do të vijojë të hetohet nën masën e arrestit në shtëpi.
Çështja mbetet e pazbardhur plotësisht, ndërsa hetimet duhet të përcaktojnë përgjegjësitë individuale, rolin e personave të përfshirë dhe nëse shumat e kriptomonedhave kanë qenë shkaku i krimit.