Florenc Çapja, një nga emrat më të njohur të botës së krimit në Shqipëri, nuk është lejuar të votojë në zgjedhjet e 11 majit.
Kërkesa e tij drejtuar Gjykatës së Shkallës së Parë të Juridiksionit të Përgjithshëm Tiranë u rrëzua nga gjyqtarja Ina Hoxhaj, për shkak të dënimit të tij me burgim të përjetshëm.
Ndërsa janë paraqitur gjithsej 159 kërkesa nga të burgosur për të marrë leje votimi, vetëm 137 janë pranuar. Çapja nuk ishte mes tyre.
44-vjeçari është dënuar për porositjen e vrasjes së Nezir dhe Gentian Beqirit, babë e bir, në vitin 2012 në Elbasan.
Sipas Prokurorisë së Posaçme, Çapja kishte paguar 50 mijë euro për ekzekutimin, ndërsa dëshmia vendimtare në këtë çështje u dha nga Ervis Bardhi, një i penduar i drejtësisë. Bardhi u dënua me 15 vite burg, ndërsa ekzekutori, Olsi Leku, mori dënimin maksimal burgim të përjetshëm.
Të përfshirë në atentat ishin edhe Klajdi Dokoli dhe Etjen Cani, të cilët u dënuan me nga 25 vite secili.
Pas rreth tetë vitesh në arrati në Dubai ku përfitonte nga mungesa e një marrëveshjeje ekstradimi Florenc Çapja u arrestua dhe më pas u transferua në Shqipëri, ku po vuan dënimin në një burg të sigurisë së lartë.
SPAK ka vijuar hetimet ndaj tij dhe familjes, duke vendosur sekuestro mbi disa pasuri dhe duke hetuar lidhje të tjera të dyshuara me ngjarje kriminale në Elbasan.
