Kryeministri i vendit Edi Rama, teksa prezantoi paketën e dytë ekonomike për përballimin e situatës nga koronavirusi, dha një lajm të mirë për të gjithë shqiptarët që kanë mbetur jashtë territorit të Republikës së Shqipërisë.
Rama tha se riatdhesimet do të nisin brenda kësaj jave, por qytetarët duhet të paguajnë vetë për biletën dhe hotelin.
“Iu kërkoj qytetarëve në kushtet e pamundësisë që s’po kthehen në Atdhe një ndjesë të madhe, por turp atyre që luajnë patriotash a demokratësh. Në këtë situatë të flasësh për bijtë e shqipes që i janë prerë duart nga diktatura e Ramës, kur ne e kemi marrë këtë masë për një armik të padukshëm që do na kishte grirë po të mos merreshin masat, do të thotë të nxisësh infektimin. Dua të them se po punohet dhe brenda kësaj jave, pra diku nga e shtuna do rinisim fluturimet për riatdhesime. Do të nisim nga Roma, qytetarët duhet të prenotojnë vetë biletën po ashtu edhe hotelin për qëndrim deri sa të vijë avioni”,- tha ai.
Disa ditë më parë Rama tha se nuk mund të riatdhesohen shqiptarët e mbetur jashtë kufijve sepse përbëjnë rrezik infektimi për të tjerët.
Mirëpo, pas polemikave të krijuara duket se ka ndryshuar mendim dhe do i rikthejë të gjithë me kushtin që të karantinohen për 14 ditë në hotelet e përzgjedhura nga qeveria, por pagesën do e bëjnë ata.
Rama ka prezantuar sot paketën e dytë ekonomike, duke bërë me dije se do jetë 176 mijë qytetarë që do ndihmohen, duke marrë nga 400 dollarë secili.
Sakaq, në këtë paketë të dytë u përfshi edhe turizmi, teksa sektori i turizmit, fasonët dhe bizneset prodhuese do të kenë në dispoziocion një garanci sovrane 150 milionë dollarë me ndarje risku mes qeverisë dhe bankave.
