Aktivistët e majtë të Lëvizjes Studentore ‘Studim Kritik Veprim’ (SKV) në Prishtinë, janë mbledhur pasditen e sotme para Ambasadës së Republikës së Shqipërisë, ndezën qirinj për të shprehur ngushëllime për vrasjen e të riut Klodian Rasha orët e para të mëngjesit të 8 dhjetorit nga një efektiv policie.
Studentët e Lëvizjes Studentore ‘Studim Kritik Veprim’, pas një marshimi nga qendra e tyre sociale “Sabota” në Prishtinë, janë ndalur para Ambasadës së Republikës së Shqipërisë, duke iu bashkuar thirrjes “Drejtësi për Klodianin”.
Deklarata e Lëvizjes Studentore Studim Kritik Veprim (SKV)
Drejtësi për Klodianin!
Para Ambasadës së Republikës së Shqipërisë në Prishtinë, studentë ndezën sot qirinj për të shprehur ngushëllime për vrasjen e të riut Klodian Rasha nga një polic i uniformuar e në orar të punës, si dhe u shpreh solidaritet për reagimin qytetarë në kërkim të drejtësisë për vrasjen e këtij të riu 25 vjeçar.
Të rinjtë po mbesin shpesh mes dy opsionesh dhune: të lëshojnë vendin ose të përballen me dhunën e pabarazisë dhe eliminimin nga vetë institucionet shtetërore. Këtë e gjeti edhe të riun nga Tirana, Klodian Rashën. Për këtë vrasje nga uniformat, që për nga natyra e punës duhet të ofrojnë siguri, duhet të mbahet përgjegjësi e plotë penale dhe politike, përfshirë hetimi mbi tentativën për mashtrim e manipulim të së vërtetës.
Çka në fakt po ndodh është vazhdim i dhunës për qytetarët të cilët kanë ngritur zërin në kërkim të drejtësisë. Të rinjtë e të gjithë qytetarët kanë të drejtë të protestojnë në mënyrë që të ndërtojnë një alternativë përtej dy opsioneve të dhunës që ofron sistemi.
Lëvizja Studentore STUDIM KRITIKË VEPRIM i bashkohet thirrjes “Drejtësi për Klodian”./Gazetareforma.com/
