Në kuadër të projektit të “Unazës së madhe” parashikohen të shemben 100 shtëpi në zonën e Paskuqanit. Banorët e Paskuqanit e kundërshtojnë këtë vendim dhe kanë dalur në protestë ditën e sotme. Qytetarët kanë bllokuar rrugën kryesore në shenjë proteste, ndërkohë janë përballur dhe me punonjësit e policisë, të cilët kanë tentuat që ti largojnë.
Ata bëjne thirrje institucioneve përkatëse të reagojnë në lidhje me këtë çështje dhe theksojnë se i kanë bërë kërkesë bashkisë së Kamzës, dhe kryeministrit,por që nuk kanë marrë asnjë përgjigje.
“Projekti i Unazës është devijuar. Banesa ime preket nga projekti. I bëj thirrje institucioneve që të na ndihmojnë në këtë mes. Të vënë dorën në zemër dhe të mos na prishen shtëpitë dhe tokat. Jemi ankuar. Projekti u ndryshua pasi mbaruan votimet, për interesat e vetë.
I kemi bërë kërkesë bashkisë së Kamzës, dhe kryeministrit, por nuk kemi marrë asnjë përgjigje”, thanë më herët banorët. Gjithashtu banorët e Paskuqanit kanë paralajmëruar se gjatë ditës së nesërme protesta e tyre do të zhvendoset përpara Kuvendit.
Më 19 janar ishte ministrja e Infrastrukturës dhe Energjisë, Belinda Balluku, e cila njoftoi edhe nisjen e punimeve për ndërtimin e Unazës Veriore të Tiranës – pjesë e projektit të Unazës së Madhe. Ndërkohë pjesa lindore ka përfunduar. Ajo në daljen e saj publike bëri me dije se janë marrë të gjitha masat sa i përket shpronësimeve dhe qytetarët duhet të informohen për ecurinë e punimeve.
Unaza e Madhe e Tiranës përbën nëj segment 27 km të gjatë , e cila do t’i kushtojë në total buxhetit një vlerë prej 373 milionë eurosh. Ajo pritet të përfundojë në vitin 2023 dhe ka si qëllim lehtësimin e trafikut brenda Tiranës, si dhe lidhjen e kryeqytetit me të gjitha rrugët dalëse kombëtare. Ky projekt bën të mundur rikualifikimin urban në zonat ku ajo kalon, çka do të rrisë vlerën e banesave dhe pronave të tjera në të dy krahët e rrugës.
