Përjashtimi nga Komisioni për Azilin dhe Refugjatët ka nxitur reagimin e Komitetit Shqiptar të Helsinkit, i cili i është drejtuar me një letër të hapur Ministrisë së Brendshme duke i kërkuar shpjegime për këtë vendim.
Në një intervistë për Fax News, drejtoresha ekzekutive e Komitetit Shqiptar të Helsinkit, Erida Skëndaj i kërkon Ministrisë së Brendshme të reflektojë në lidhje me vendimin për përjashtimin e KShH nga Komisioni për Azilantët dhe Emigracionin.
“Vendimmarrjet të komisionit për Azilin dhe Refugjatët nuk janë vendimmarrje të formës së prerë që do të thotë që si një organ kolegjial mund të marrë vendime që janë të ankimueshme dhe këto vendimmarrje mund të kundërshtohen në raste të caktuara.
Në shumë prej rasteve që ka pasur ankesa nga azilantët, ne kemi qëndruar në pakicë pra duke i mbështetur me arsyetimin se konventat ndërkombëtare të miratuara nga vendi ynë parashikonin një mbrojtje më të mirë dhe adekuate dhe atyre t’u lehohej të qëndronin në territorin e republikës së Shqipërisë”– u shpreh Skëndaj ndër të tjera.
Skëndaj thotë se lajmin se janë përjashtuar nga Komisioni e kanë marrë duke kontrolluar vetë në faqen zyrtare të Ministrisë. Ndër të tjera, zonja Skëndaj thekson se roli i KShH ka qenë gjithmonë mbrojtja e të drejtave të azilkërkusve, gjë e cila është reflektuar dhe me qëndrimin në pakicë për çështje të ndryshme.
