Deputetët e opozitës folën për mediat pas mbylljes së seancës së sotme parlamentare dhe incidenteve që ndodhën gjatë kësaj seancë, brenda dhe jashtë sallës. Ata u shprehën se ajo që ndodhi sot është vetëm fillimi dhe se aksioni i opozitës do të vazhdojë. Deputeti i PD, Flamur Noka, që u përjashtua nga seanca plenare pas incidenteve në parlament, tha se Edi Rama i hapi luftë opozitës. Noka theksoi se pa qeveri teknike, PD nuk do të ndalet. Ai tha se Shqipëria do të nisë protestat e mëdha, duke filluar nga data 7 tetor.
Flamur Noka: Prej 3 vitesh i kanë vënë flakën demokracisë në Shqipëri. Edi Rama ka 3 vjet që i ka hapur luftë opozitës. Arrestoi Berishën, burgosi Belerin, burgosi Salianjin. Ne jemi të vendosur të mos ndalojmë, Edi Rama nuk mund të likuidojë opozitën, opozita sot është në ballë të aksionit. Çdo të hënë dhe çdo të enjte do të jetë kjo situatë. Zgjidhja është qeveria teknike. Rama kërcënon me burg këdo që denoncon lidhjet e maxhorancës me krimin. Edi Rama po vepron në mënyrë hakmarrëse. Ne do i dalim Zot demokracisë. Nuk ka kompromis me mafien dhe krimin e organizuar që është në parlament. Ne jemi në betejë, pa qeveri teknike, me narko-qeveri, Shqipëria nuk ka paqe.
Ndërkohë të njëjtën retorikë përsëriti edhe deputetja tjetër e PD, Dhurata Çupi. Ajo paralajmëroi se skenat që ndodhën sot në Parlament do të jenë prezentë në çdo seancë nga sot e tutje. Sipas saj ajo që ndodhi sot ne Parlament ka ardhur si përgjigje e opozitës kundrejt kryeministrit Edi Rama, i cili sipas saj “ka djegur Kushtetutën dhe ka shitur Shqipërinë”. “Këto pamje i ka detyruar Edi Rama, i cili ka djegur Kushteutën, ka shitur Shqipërinë. Nuk ka asnjë lloj normaliteti me Edi Ramën kryeministër. Do të na ketë përballë, këtë pamje do ta shikoni çdo të hënë dhe çdo të enjte”, u shpreh ajo.
Ina Zhupa u shpreh se shqiptarët do të jenë në rrugë në protestën e thirrur në datën 7 tetor, duke theksuar se “nëse nuk respektohen liritë dhe të drejtat e njeriut këtij sistemi do t’i dalë flaka”. “Kur këto padrejtësi iu bëhen deputetëve të opozitës, tregon se shqiptarët sot kanë nevojë për mbrojtjen e opozitës. Shqiptarët do të jenë në rrugë në 7 tetor ora 18.00 që flaka do t’i dalë këtij sistemi nëse nuk respektohen liritë dhe të drejtat e njeriut”, u shpreh ajo. Nga ana tjetër Luan Baçi u shpreh se Ervin Salianji do të vijojë fushatën për demokratët nga burgu.
Ai theksoi se kjo situatë ka nisur me arrestimin e Sali Berishës në fund të vitit 2023, ndërsa shtoi se në protestën e 7 tetorit “do të flasë sovrani”.
“Ata janë vandalët e korrupsionit. Na quajnë ne vandalë? Burgosën Ervin Salianjin. Salianji do ta vazhdojë fushatën edhe aty, bashkë me ne, ne nuk do të ndalojmë. Kjo ka filluar në 30 dhjetor 2023 me arrestimin e Sali Berishës. Që atë ditë duhet të kishim ndezur zjarr të gjithë vendin. Sot, arrestuan një deputet të PD, nënkryetarin e grupit parlamentar për fjalën e lirë, pse denoncoi një trafikant droge. Nga denoncimi i Ervin Salianjit trafikanti i drogës shkoi në burg në Romë me këmbët e tij. I vendosin emrin kallëzim të rremë, gjyqësor i Edi Ramës. Në 7 tetor do të flasë sovrani, nuk ka fjalime, do të flasin qytetarët” tha Baçi.
