Kenia/ I detyronte të agjëronin për të shkuar në parajsë, vdiqën nga uria 182 fëmijë dhe 8 të tjerë u vranë: Kreu i kultit fetar dënohet me 200 vite burg

Një nga krimet më të rënda të kryera në emër të fesë në Kenia ka përfunduar me dënimin me 200 vite burg të Paul Mackenzie-t, udhëheqësit të një kulti fetar që i detyronte ndjekësit të agjëronin deri në vdekje, duke u premtuar se kështu do të shkonin në parajsë. Nga 191 viktimat për të cilat u dënua, 190 ishin fëmijë, disa prej të cilëve u vranë pasi nuk iu bindën praktikave ekstreme të kultit.

Vendimi u shpall të premten nga Gjykata e Lartë në Mombasa, e cila dënoi edhe më shumë se dy duzina persona të tjerë të përfshirë në këtë çështje.

Mackenzie, themelues i Kishës Ndërkombëtare Good News, kishte bindur ndjekësit se fundi i botës do të vinte në gusht 2023 dhe se e vetmja mënyrë për të shpëtuar shpirtin ishte të hiqnin dorë nga ushqimi deri në vdekje.

Ai i kishte nxitur familjet të braktisnin banesat dhe të zhvendoseshin në pyllin Shakahola, në lindje të Kenias, ku mbaheshin nën kontroll dhe pengoheshin të largoheshin.

182 fëmijë vdiqën nga uria, tetë të tjerë u vranë

Sipas vendimit gjyqësor, 183 persona humbën jetën nga uria, mes tyre 182 fëmijë dhe një i rritur. Tetë fëmijë të tjerë u vranë përmes mbytjes, shtrëngimit të qafës ose dhunës fizike.

Të dhënat e gjykatës tregojnë se 161 viktima ishin fëmijë deri në moshën 9-vjeçare, ndërsa 22 të tjerë ishin nga 10 deri në 13 vjeç. Pesë viktima ishin adoleshentë të moshës 14 deri në 16 vjeç.

Gjyqtarja Diana Kavedza zbuloi se vdekjet ishin planifikuar sipas një rendi të përcaktuar. Fëmijët duhej të vdisnin të parët, më pas të rinjtë dhe gratë, ndërsa burrat do të qëndronin gjallë për të varrosur trupat, përpara se të vdisnin edhe vetë.

Fëmijët lidheshin dhe ndëshkoheshin nëse kërkonin ushqim

Gjatë gjykimit u zbuluan praktikat e dhunshme që zbatoheshin brenda komunitetit. Rojet kontrollonin ndjekësit dhe pengonin çdo përpjekje për t’u larguar nga pylli.

Personat që kundërshtonin agjërimin detyroheshin ta vazhdonin, ndërsa fëmijët lidheshin, liheshin pa ushqim dhe ndëshkoheshin nëse përpiqeshin të hanin ose të arratiseshin.

Të mbijetuarit dëshmuan se vdekjet paraqiteshin si bashkim me Jezusin dhe viktimat konsideroheshin heronj të besimit.

Në gjykatë u paraqitën gjithashtu komunikime në WhatsApp dhe materiale të shkruara, të cilat tregonin se Mackenzie kishte dhënë udhëzime për ndjekësit përpara zhvendosjes së tyre në Shakahola.

Pse gjykata nuk e dënoi me vdekje?

Mackenzie u dënua me 100 vite burg për vdekjet e shkaktuara nga uria dhe 100 vite të tjera për vrasjet e drejtpërdrejta.

Gjyqtarja Kavedza vendosi të mos aplikonte dënimin me vdekje, duke argumentuar se një masë e tillë mund të mos kishte efekt parandalues. Sipas saj, të dënuarit mund ta interpretonin ekzekutimin si një mundësi për t’u bashkuar me Jezusin.

Gjykata mori parasysh edhe mundësinë që të dënuarit të bashkëpunojnë me autoritetet për gjetjen e eshtrave të fëmijëve ende të zhdukur.

Mackenzie ishte shpallur fajtor për vrasje muajin e kaluar, ndërsa gjatë shpalljes së dënimit u pa duke buzëqeshur disa herë.

Mbi 400 trupa të zhvarrosur nga pylli

Tragjedia u zbulua në prill 2023, kur autoritetet keniane nisën gërmimet në pyllin Shakahola, pas informacioneve se ndjekësit e predikuesit po vdisnin nga uria.

Deri tani janë zhvarrosur mbi 400 trupa, ndërsa identifikimi i viktimave dhe hetimet vazhdojnë.

Stephen Mwiti, i cili humbi gjashtë fëmijët e tij, tregoi se bashkëshortja i kishte dërguar në pyll. Edhe ajo është mes personave të dënuar.

Një tjetër familjar, Rodgers Shibutse, i cili identifikoi trupin e nënës së tij, deklaroi se vendimi i gjykatës nuk mund t’ia kthente njeriun e dashur, por të paktën përgjegjësi kryesor nuk do të ishte më i lirë.

Autoritetet keniane vijojnë hetimet për tragjedinë e Shakaholas dhe nuk përjashtojnë ngritjen e akuzave të tjera për viktimat e shumta të zbuluara në zonë.