Rrjete kriminale me bazë në Azi kanë përfituar miliarda dollarë nga mashtrime kibernetike dhe tani po zgjerojnë aktivitetin e tyre në Evropë, Afrikë, Amerikën e Jugut dhe më tej.
OKB-ja paralajmëron se këto grupe janë kthyer në një industri të organizuar globale dhe kërkon bashkëpunim ndërkombëtar për t’u përballur me to.
Sipas Zyrës së Kombeve të Bashkuara për Drogën dhe Krimin, bandat kryesisht nga Kina dhe Azia Juglindore përdorin mashtrime të sofistikuara, përfshirë premtime për investime fitimprurëse, lidhje romantike të rreme dhe skema me kriptomonedha.
Mijëra viktima rekrutohen dhe trafikohen për t’u detyruar të punojnë në kushte skllavërie digjitale, duke mashtruar të tjerë në internet.
Autoritetet në disa vende të Azisë kanë nisur aksione për të frenuar këto rrjete, por ato thjesht zhvendosin operacionet nga një shtet në tjetrin.
“Ky krim po përhapet si një kancer, e godet në një vend, por ai nuk zhduket vetëm lëviz”, tha Benedikt Hofmann nga UNODC.
Sipas të dhënave të UNODC, në vitin 2023, vetëm në Azinë Lindore dhe Juglindore, mashtrimet kibernetike gjeneruan mbi 37 miliardë dollarë, ndërsa në SHBA humbjet shkuan mbi 5.6 miliardë.
Rrjetet janë duke u shtrirë në kontinente të tjera, përfshirë Amerikën Latine, Afrikën, Lindjen e Mesme, Evropën dhe edhe disa ishuj të Paqësorit.
OKB-ja e cilëson situatën si një “pikë kritike kthese” dhe paralajmëron se mungesa e aksioneve të përbashkëta do të sjellë pasoja të rënda jo vetëm për Azinë Juglindore, por për të gjithë botën. /DW
