Në lidhje me situatën kaotike dhe rradhën e madhe për të hyrë në shtetin fqinj Greqi nëpërmjet pikës kufitare të Kakavijës ka reaguar edhe Partia Demokratike.
Ka qenë vetë kreu i kësaj partie, Lulzim Basha i cili nëpërmjet një postimi në Twitter ka shpërndarë deklaratën e plotë të Partisë Demokratike duke shkruar “Njerëz të braktisur nga një qeveri e dështuar, turp!”
Më tej në deklaratën e PD-së thuhet se është është e pafalshme që qeveria lejoi krijimin e radhëve të gjata, dhe nuk informoi qytetarët në kohë. Dhe se zgjidhja e krizës humanitare kërkon angazhimin në nivelet më të larta të qeverisë dhe komunikim të vazhdueshëm me qytetarët shqiptarë pasi njerëzit meritojnë të trajtohen me dinjitet nga shteti i tyre.
Deklarata e PD-së
Mendimet dhe lutjet tona janë sot me prindërit dhe familjarët e fëmijës që humbi sot jetën në aksidentin tragjik, në mesin e krizës humanitare të krijuar prej 4 ditësh në pikën kufitare të Kakavijës. Zoti ju dhëntë forcë për ta përballuar dhimbjen dhe këtë humbje të rëndë.
Kjo ngjarje e rëndë është një tjetër alarm tragjik për braktisjen e qytetarëve nga qeveria. Është e pafalshme që qeveria lejoi krijimin e radhëve të gjata, dhe nuk informoi qytetarët në kohë.
Është në përgjegjësinë e qeverisë që Shqipëria u shndërrua në zonë të kuqe COVID, pasojë e të cilës është edhe kjo krizë humanitare në kufi.
Kjo krizë nuk zgjidhet me propagandë në rrjetet sociale. Nuk zgjidhet me postime virtuale nga rezidencat luksoze qeveritare ku pushon kryeministri, dhe as me xhiro me helikopter dhe rikthim në hotele me 5 yje ku pushojnë anëtarët e kabinetit të tij qeveritar.
Zgjidhja e krizës humanitare kërkon angazhimin në nivelet më të larta të qeverisë dhe komunikim të vazhdueshëm me qytetarët shqiptarë. Njerëzit meritojnë të trajtohen me dinjitet nga shteti i tyre.
Njerëz të braktisur nga një qeveri e dështuar. Turp! https://t.co/5m4HryK92S
— Lulzim Basha (@lulzimbasha_al) August 15, 2020
