Tirana dhe mbarë opinioni publik janë tronditur pas ngjarjes tragjike të ndodhur më 18 nëntor 2024, ku një 14-vjeçar humbi jetën dhe një tjetër u plagos pas një përleshjeje me thikë pranë shkollës “Fan Noli” në kryeqytet.
Pas këtij incidenti, shumë media kanë raportuar për ngjarjen, duke shqyrtuar shkaqet që çuan në dhunën mes adoleshentëve.
Për të mbajtur një qëndrim të balancuar dhe etik në raportimin e ngjarjes, Autoriteti i Mediave Audiovizive (AMA) ka reaguar, duke vlerësuar se shumica e mediave audiovizive po i qasen ngjarjes me profesionalizëm dhe kujdes.
AMA e ka theksuar se mbulimi i ngjarjes po bëhet duke u përpjekur të shmangë çdo dëm të mundshëm për familjarët dhe të afërmit e viktimave, duke respektuar dhimbjen e tyre.
Megjithatë, Autoriteti ka vënë re se disa media kanë publikuar informacione të pakonfirmuara dhe detaje të panevojshme që mund të dëmtojnë më shumë ndjenjat e viktimave dhe të krijojnë një perceptim sensacionalist të ngjarjes.
AMA ka bërë thirrje që të respektohen të drejtat e fëmijëve dhe familjarëve të prekur, duke shmangur shfrytëzimin e ngjarjes për qëllime sensacionaliste.
Në reagimin e saj, AMA ka ripërsëritur angazhimin për të monitoruar çdo rast të shkeljes së etikës profesionale dhe të rregulloreve ligjore, duke ndjekur përmbajtjen e mediave dhe duke adresuar çdo abuzim që mund të ndodhi. Ajo ka ftuar mediat që të ushtrojnë përgjegjësi maksimale dhe të respektojnë standardet ligjore dhe kodekset etike të përcaktuara nga ligji 97/2013 “Për mediat audiovizive në Republikën e Shqipërisë”.
Përfundimisht, AMA theksoi se është e domosdoshme që ngjarje të tilla tragjike të mbulohen me etikë, përgjegjësi dhe profesionalizëm, duke mbajtur parasysh interesin më të lartë të fëmijëve dhe të drejtën e familjarëve për të jetuar dhimbjen e tyre në privatësi dhe dinjitet.
