Ndahet nga jeta në moshën 64-vjeçare poeti i njohur Arben Duka

Arti shqiptar sot është në zi pasi poeti i njohur, Arben Duka, në moshën 64-vjeçare është ndarë nga jeta.Mësohet se Duka vuante prej kohësh nga probleme të rënda shëndetësore.

Lajmi i hidhur është bërë me dije nga gazetari Aleksandër Çipa në rrjetet sociale.  “Lamtumirë Arben Duka! Mirëmbeç Poet i pavdekshëm!!!”.

Arben Duka lind në Labovë të Gjirokastrës. Ka mbaruar Akademinë Ushtarake dhe Universitetin “Aleksandër Xhuvani”. Ai ka ndofta biografinë më të pasur letrare dhe artistike në vend. Është autor i mbi pesëdhjetë vëllimeve poetike të botuara e të ribotuara gjer në pesë herë.

Është bashkautor në rreth tre mijë këngë duke filluar qysh nga viti 1974. Ka dhjetëra çmime si autor dhe bashkautor në gjininë e këngës, ku spikasin shtatë çmime të para në Festivalet Kombëtare të këngës në Radio Televizionin Shqiptar. Është autor i mijëra e mijëra vargjeve humoristik dhe satirikë në shumë të përditshme dhe periodike. Duka është autor i tekstit të Himnit të Policisë së Shtetit.

Disa nga veprat e tij të njohura janë: “Nektari i këngëve”, “Njëmijë puthje”, “Ç’të bëj me fjalën?”, “Letra dashurie-në pesë libra të veçantë”, “Unë isha një i vetëm”, etj.

Duka është vlerësuar me titujt:  “Nderi i Qarkut Gjirokastër”, “Nderi i Odries”, “Nderi i Lunxhërisë”, “Nderi i veteranëve të luftës”, “Qytetar Nderi i Gjirokastrës”.