Të fortit të Tiranës nuk i është dhënë sot ende një vendim nga Gjykata.
Seanca e radhës ndaj Emiliano Shullazit dhe të 4 bashkëfajtorëve në Apelin e Posaçëm ka dështuar.
Shkak i shtyrjes është bërë mosparaqitja e avokatit të zgjedhur nga Blerim Shullazi dhe i avokatit kryesisht për Endrit Qyqen.
Procesi në fjalë nuk zhvillohet prej dhjetorit 2018 dhe numëron mbi 40 seanca të shtyra.
Në fund të korrikut, Shullazi dhe anëtarët e grupit të tij u izoluan në regjimin “41 Bis”.
Në vitin 2018 të pandehurit e dosjes u dënuan me 55 vite burg në total, megjithatë deri tani nuk është dhënë asnjë vendim i saktë dhe konkret.
Akuza dhe gjyqi ndaj Shullazit
Grupi ‘Shullazi’, është dënuar më 13 nëntor 2018, me 55 vite burg nga Gjykata e Shkallës së Parë për Krimet e Rënda. Vendimi është apeluar nga grupi, ndërsa koka e bandës, Emiljano Shullazi, është dënuar për veprën e “gjobëvënies” ndaj dy biznesmenëve, Ylvi Beqja në të famshmen çështje të “Hotel Vollgës” dhe Jani Zakës, me 14 vite burg.
Për katër anëtarët e tjerë të grupit, Gjykata ka dhënë 12 vite burg për Gilmando Danin, Indrit Qyqja, 10 vite, Indrit Zela, 10 vite dhe Blerim Shullazi, 9 vite burg.
Në vendimin e Gjykatës theksohej se, askush nga të dënuarit nuk do të përfitojë liri me kusht. Dy akuzat e tjera, shkatërrim prone me eksploziv dhe kanosje ndaj dy pedagogëve, Mynyr Koni dhe Dhori Kule, kanë rënë.
/GazetaReforma.com/
