Trafiku në qytetin e Tiranës është kthyer në një problem të përditshëm për qindra mijëra banorët e saj. Pothuajse në çdo rrugë hasesh me dyndje makinash, për të mos folur pastaj për pikat hyrëse-dalëse, ku trafiku është i pranishëm pothuajse çdo orë të ditës.
Për të gjetur arsyet e trafikut, Ministria e Infrastrukturës dhe Energjisë, shkon deri aty sa tallet edhe me banorët dhe qytetarët. Në një postim në rrjetet sociale, ministria shprehet se trafiku vjen nga aksidentet rrugore, punimet në rrugë, motit me shi, por për çudi, trafiku aq i rënduar vjen edhe nga “drejtues mjetesh të papërgjegjshëm të cilët nuk respektojnë rregullat e qarkullimit rrugor dhe sinjalistikat!”
Ky është shpjegimi i ministrisë, që trafikun prej kilometrash, e lidh me faktin se një apo disa qytetarë bëjnë manovra në rrugë, dhe sipas tyre, shkaktohen edhe radhët kilometrike.
Postimi i Ministrisë së Belinda Ballukut
Problemet e vërteta
Ministria harron rrugët kryesore të qytetit, të gjitha të ngushtuara nga korsitë e biçikletave,
harron punimet të hapura në disa rrugë njëkohësisht, që paralizojnë kështu rrugët që janë alternativë,
harron kantieret e pallateve kudo nëpër Tiranë të dhëna me leje nga bashkia, mjetet e të cilave prej tonazhi të rëndë qarkullojnë në çdo orë të ditës duke rënduar akoma më shumë trafikun.
Kur të zgjidhen gjithë këto, atëherë Minsitria mund të fajësojë qytetarët për manovrat e tyre në rrugë. Por, për fat të keq rrugët janë aq të bllokuara, sa mezor gjen mundësi të kthehesh, e jo më të bësh manovra…
Pamje nga trafiku diten e djeshme, 13 tetor 2020
/GazetaReforma.com/
