Banda e Suel Çelës ka shtrirë ndikimin e saj në institucione kyçe si gjykatat, prokuroritë, dhe ish-Këshillin e Lartë të Drejtësisë (KLD).
Sipas dosjes hetimore të Prokurorisë së Posaçme, grupi mbështetej nga gjyqtarja Pajtime Fetahu, e cila kishte një histori të gjatë akuzash për korrupsion.
Një episod i përfshirë në dosje tregon përpjekjet e Suel Çelës për të ndikuar mbi gazetarët Artan Hoxha dhe Saimir Kodra, pasi ky i fundit kishte denoncuar shkeljet e Fetahut në emisionin “STOP”.
Në bisedat e zbardhura nga Sky ECC, del edhe emri i ish-Presidentit Ilir Meta, që kishte një rol vendimtar në rikthimin e Fetahut në sistemin gjyqësor.
Më datë 03.03.2020 Marjus Lulaj komunikon me Artan Hoxhën të cilit i shkruan “…desha te pys…me ate sajmirin e stopit ke mohabet…ke shum…apo thjesht?…me ka kerku nje mikesha ime ndim…esht gjygjtare elbasan…i bie ne qaf ai…pantime fetahu…pajtime…i ka kap ana keqe…e sulmoi ai…ajo e denoncoi…e kshu me rradh…ai denonco ajo kallzim gjykat…e ka kap personale pak… vetem mos meret me me ate…
Mir zotni…un e riktheva ne pun kte…se nuk e fuste ne rend dite Likja…kur ishte kreu i (KLD)…esht burrnesh…bahet copash per te ndimu… ti ske nevoj per kta por si dihet ta kerkon nai mik…”, thuhet në mesazh.
Pajtime Fetahu ishte pezulluar nga KLD në shkurt 2017 pas publikimit të përgjimeve ku kërkonte 2 mijë euro për lirimin e një të burgosuri.
Megjithatë, në shtator 2017, Prokuroria e Krimeve të Rënda pushoi çështjen kundër saj për mungesë provash, duke hapur rrugën për rikthimin e saj.
Nga viti 2017 deri në 2018, KLD nuk e përfshiu kërkesën e saj në rendin e ditës, derisa ndërhyri Meta, në atë kohë kryetar i KLD-së.
