Edhe sikur të jenë të “shpejta flakë” gjithsesi mbeten vetëm teste dhe nuk ndryshojnë asnjë gjë nga ky realitet… Por gjithsesi Ministria e Shëndetësisë është munduar që të shesë me bujë sot sigurimin e të paktën 100 mijë “testeve të shpejta” për koronavirusin, në një kohë që nesër Rusia dhe javën tjetër Britania e Madhe do të nisin nga vaksinimi masiv i popullatës.
Pikërisht atëherë kur qeveritë e botës me gjithë masat e shtrëngimit, u kanë dhënë siguri qytetarëve të tyre se do të festojnë në mëntrë sa më normale festimet e fund vitit, në një kohë që po bëjnë përpjekje për sigurimin e vaksinave, shteti shqiptar është ende te testimet.
Ministrja e Shëndetësisë, Ogerta Manastirliu, njoftoi sot se ditën e hënë të javës së ardhshme, do të nisin testimet e shpejta për identifikimin e koronavirusit.
Manastirliu, në një deklaratë për mediat, tha se, aplikimi i testimit të shpejtë do të nisë fillimisht në Tiranë nga epidemiologët, në “vatrat që do vlerësohen prej tyre, bazuar në udhëzuesin e miratuar nga ISHP dhe Komiteti i Ekspertëve”.
Ajo shtoi se më 20 Dhjetor, testimet e shpejta do shtrihen dhe në disa poliklinika dhe disa qendra shëndetësore në Tiranë dhe më pas, sipas një kalendari, në disa struktura shëndetësore në gjithë vendin.
Pikat e testimit, shtoi, do bëhen të njohura ditët në vijim dhe do mbulojnë zona të caktuara gjeografike.
Sigurohen vetëm 100 mijë testime
Në shumë shtete testimet e shpejta për koronavirusin dhe fare të pakushtueshme tani po bëhen edhe në farmaci. Ndërkohë sot ministrja shqiptare e Shëndetësisë, Manastirliu, tha se “kemi siguruar 100 mijë testime të shpejta”- dhe shtoi se,- “jemi në procedura për të siguruar mbi 300 mijë të tjera”.
Testimet e shpejta e nxjerrin rezultatin në një kohë shumë më të shkurtër se testimet PCR, që janë përdorur deri tani nga autoritetet shëndetësore. “Përgjigjet merren brenda 30 minutave”,- shpjegoi Silva Bino, anëtare e Komitetit Teknik.
Ndërsa ministrja Manastirliu tha se, testimet PCR, po ashtu, do të vijojnë të aplikohen.
Sipas Manastirliut, një fond prej 8 milionë eurosh është dedikuar për mbështetjen speciale për stafet tona në terren, spitalet dhe operatorët e kujdesit shëndetësor.
“Në fillim të kësaj epidemi numëroheshin rreth 200 respirator, sot kemi 483 respiratorë të dedikuar në funksion të mbështetjes së terapive intensive”,- deklaroi ministrja.
Testi i shpejtë
Silva Bino ka sqaruar udhëzimin për kryerjen e testit të shpejtë. Në prezantimin e bërë sot bashkë me Ministren e Shëndetësisë, Bino, sqaroi qytetarët se testi i shpejtë duhet të bëhet brenda 5 ditësh që nga shfaqja e simptomave.
Në të kundërt, kur kanë kaluar 5 ditë nga simptomat, testi që duhet kryer është ai i PCR.
Në rast se testi “Rapid”, del pozitiv, ajo tha se, duhet marrë si 100% i saktë.
“Testi i antigenit kryhet në 5 ditët e para të simptomave. Ky është një informacion që duhet të dihet. Nëse është pozitiv, ai është vërtetë pozitiv, mat ngarkesën virale. Përgjigja del për 30 minuta.
Kjo është lehtësi e madhe sepse i jep direkt përgjigjen personit dhe lehtëson gjurmimin. Ky test do të na ndihmojë të plotësojmë disa elementë të punës sonë në terren.
Po kryhen disa trajnime. Është test i njohur nga OBSH dhe i aprovuar nga FDA, pra është test që plotëson të gjitha cilësitë e saj”,- tha shefja e departamentit të sëmundjeve infektive në ISHP.
/Burimi: Iconstyle.al/
