Media spanjolle “The Objective”: “Pushteti i Edi Ramës po dobësohet”, protestat dhe korrupsioni në fokus

Protestat qytetare në Tiranë dhe akuzat për korrupsion ndaj niveleve të larta të pushtetit kanë tërhequr vëmendjen e medias spanjolle “The Objective”, e cila i ka kushtuar një analizë të gjatë situatës politike në Shqipëri. Që në hyrje të shkrimit, media spanjolle e përmbledh situatën me një deklaratë të fortë: “Pushteti i Edi Ramës në Shqipëri po dobësohet”.

Në qendër të artikullit është ajo që protestuesit e kanë quajtur “revolucioni i flamingove”, protestat e zhvilluara jashtë rezidencës zyrtare të kryeministrit në Tiranë. “The Objective” shkruan se këtë të diel qytetarët janë thirrur sërish në demonstratë, pas 127 ditësh protestash të njëpasnjëshme.

Sipas medias spanjolle, demonstruesit kundërshtojnë atë që e konsiderojnë “një sistem totalitar të korruptuar” dhe kërkojnë arrestimin e kryeministrit Edi Rama dhe Belinda Ballukut, ish-zëvendëskryeministres përgjegjëse për infrastrukturën.

Artikulli ndalet te hetimet ndaj Ballukut për manipulimin e kontratave të punëve publike për rrugë dhe tunele me vlerë 190 milionë euro, si dhe te akuzat për ryshfet dhe pastrim parash.

Media spanjolle e vendos situatën në një panoramë më të gjerë të përballjes së zyrtarëve të lartë shqiptarë me drejtësinë. Në shkrim përmendet se një ish-president, një ish-kryeministër, dy ish-zëvendëskryeministra, kryetari i Bashkisë së Tiranës dhe disa zyrtarë të lartë të institucioneve me buxhete të konsiderueshme publike janë nxjerrë në gjyq, janë burgosur ose po përballen me procedura ligjore.

Në artikull përmendet gjithashtu ish-shefja e inteligjencës, Vlora Hyseni. “The Objective” shkruan se Hyseni, shtetase kosovare, ndodhet nën arrest shtëpiak për rrjedhjen e informacionit të klasifikuar lidhur me një çështje korrupsioni te një person në arrati, me të cilin, sipas artikullit, kishte komunikuar 87 herë brenda gjashtë muajve.

Një pjesë e rëndësishme e analizës i kushtohet drejtësisë dhe SPAK. Media spanjolle e konsideron mungesën e pavarësisë gjyqësore si një prej sfidave kryesore të Shqipërisë, ndërsa thekson se prokurorët dhe gjyqtarët kanë vijuar hetimet ndaj pushtetit politik.

“The Objective” e krahason situatën me atë të Gjykatës Kombëtare të Spanjës, duke shkruar se SPAK po përballet me një numër në rritje çështjesh që lidhen me korrupsionin politik, trafikun e drogës, pastrimin e parave dhe krimin e organizuar.

Rama dhe marrëdhënia me Pedro Sánchez

Në analizë zë vend edhe marrëdhënia e Edi Ramës me kryeministrin spanjoll Pedro Sánchez. “The Objective” e përshkruan Ramën si një aleat të afërt të Sánchez dhe kujton se kreu i qeverisë shqiptare ka folur publikisht për miqësinë personale me homologun spanjoll.

Media rikujton edhe mbështetjen që Rama i dha Sánchez kur kryeministri spanjoll mori pesë ditë pushim për shkak të problemeve ligjore të bashkëshortes së tij, Begoña Gómez.

“Mos u dorëzoni kurrë”, shkroi Rama në Twitter, duke kritikuar ata që, sipas tij, manipulonin faktet.

Nga ana tjetër, Sánchez ka vlerësuar vullnetin reformist të Ramës, ndërsa Pallati Moncloa ka nënvizuar marrëdhëniet e mira mes dy qeverive. Sipas artikullit, gjatë gjashtë viteve të fundit Rama dhe Sánchez janë takuar të paktën shtatë herë.

“Revolucioni i flamingove”

“The Objective” ndalet gjerësisht edhe te mesazhet e protestave. Sipas medias, demonstruesit kanë denoncuar atë që e quajnë “mafia e Ramës”, krimin, korrupsionin dhe pushtetin e “oligarkëve” mbi ekonominë shqiptare. Mes emrave të përmendur është familja Kastrati, pronare e Aeroportit Ndërkombëtar të Tiranës dhe e një rrjeti të gjerë pikash karburanti.

“Shqipëria po bën thirrje për revolucion” është një prej sloganeve që, sipas shkrimit, është dëgjuar në protesta.

Artikulli vëren se Shqipëria po kalon një periudhë zhvillimi të shpejtë ekonomik, të shoqëruar nga bumi i turizmit në bregdet dhe transformimi i shpejtë urban i Tiranës. Megjithatë, “The Objective” sjell pretendimet e kritikëve të qeverisë se lejet e shumta të ndërtimit po përdoren për të lehtësuar pastrimin e miliarda eurove të ardhura nga rrjetet e trafikut të drogës, përmes investimeve në hotele dhe komplekse luksoze banimi.

Dhjetëra kulla të përfunduara ose ende në ndërtim dominojnë tashmë horizontin e kryeqytetit, ndërsa media spanjolle sjell edhe termin me të cilin kritikët i referohen atyre: “kullat e kokainës”.

“Poshtë narko-shteti” është një tjetër thirrje e protestuesve. Sipas artikullit, demonstratat e para kanë tërhequr turma me mbi 100 mijë persona.

Në shkrim përmendet gjithashtu se FBI ka mbërritur së fundmi në Tiranë dhe i ka dorëzuar sistemit shqiptar të drejtësisë dokumentacion të lidhur me drogën, zhvillim që, sipas “The Objective”, ka shkaktuar interes të madh në qarqet ligjore dhe gazetareske.

Sazani dhe investimi 1.4 miliardë dollarë

Një tjetër pikë e fortë e artikullit është projekti i lidhur me Ivanka Trump dhe bashkëshortin e saj, Jared Kushner, për ndërtimin e një resorti të madh luksoz.

Investimi, me vlerë 1.4 miliardë dollarë, prek ishullin e Sazanit, të cilin artikulli e përshkruan si një rezervat natyror të mbrojtur dhe të njohur për tufat e flamingove, por edhe për pozicionin strategjik në Mesdhe.

“Shqipëria nuk është në shitje” është një prej sloganeve të protestave që lidhen me këtë çështje. Pikërisht nga flamingot, sipas artikullit, ka marrë emrin edhe lëvizja protestuese.

Kryeministri Edi Rama ka argumentuar se qeveria e tij nuk po u fal tokë publike investitorëve të huaj, por se investitorët e kanë blerë tokën nga privatët. Rama ka deklaruar gjithashtu se e ardhmja e projektit do të përcaktohet nga vlerësimi i ndikimit në mjedis dhe ka garantuar se investimi duhet të përmbushë kërkesat mjedisore të Bashkimit Evropian.

Integrimi në BE dhe pushteti i Ramës

“The Objective” e lidh situatën politike edhe me procesin e integrimit evropian. Shqipëria synon anëtarësimin në Bashkimin Evropian deri në vitin 2030, por për këtë duhet të përafrojë kuadrin ligjor me atë të BE-së, përfshirë standardet për qëndrueshmërinë, luftën kundër korrupsionit dhe garancitë demokratike.

Artikulli kujton se Edi Rama erdhi në pushtet në vitin 2013 dhe se në vitin 2017 dyshimet për manipulim të zgjedhjeve parlamentare kishin shkaktuar një prej protestave më të rëndësishme të viteve të fundit, duke iu referuar Fondacionit Carnegie për Paqe Ndërkombëtare.

Në zgjedhjet e përgjithshme të vitit 2025, Rama përmirësoi rezultatin elektoral duke siguruar më shumë se gjysmën e votave. Nëse pakënaqësia sociale dhe procedurat ligjore nuk sjellin përfundimin e parakohshëm të legjislaturës, zgjedhjet e ardhshme parlamentare pritet të zhvillohen në vitin 2029.

Deri atëherë, kreu i opozitës dhe ish-kryeministri Sali Berisha do të ketë mbushur 85 vjeç.

Pavarësisht protestave dhe zhvillimeve në drejtësi, Rama nuk ka dhënë shenja se do të largohet dhe vijon axhendën e tij ndërkombëtare. Vetëm këtë javë ai priti në Tiranë Presidenten e Komisionit Evropian, Ursula von der Leyen.

“The Objective” e mbyll panoramën duke vënë në dukje pragmatizmin e Ramës në politikën e jashtme dhe marrëdhëniet e tij me drejtues politikë shumë të ndryshëm mes tyre, nga Pedro Sánchez dhe Giorgia Meloni te Mohammed bin Salman dhe Benjamin Netanyahu.

Por përtej axhendës ndërkombëtare të kryeministrit, media spanjolle e vendos theksin te presioni i brendshëm politik, protestat e vazhdueshme dhe çështjet e korrupsionit që kanë prekur nivelet e larta të shtetit, duke e përmbledhur situatën që në krye të analizës me konstatimin: “Pushteti i Edi Ramës në Shqipëri po dobësohet”.