Kryeministri Edi Rama dhe Ministrja e Shëndetësisë dhe Mbrojtjes Sociale, Ogerta Manastirliu, kanë ndjekur nga afër vaksinimin e të moshuarve në qytetin e Korçës. Manastirliu tha se deri më tani janë vaksinuar mbi 150 mijë të moshuar, ndërkohë që procesi vazhdon intensivisht në të gjithë vendin. Gjithashtu, Manastirliu theksoi se do të vijnë edhe 22 mijë doza të vaksinës Pfizer gjatë muajit prill.
“Kemi vaksinuar mbi 10 mijë qytetarë në Korçë. Kemi arritur mbi 150 mijë të moshuar të vaksinuar deri më tani. Ndërkohë që gjithsej janë mbi 206 mijë vaksinime. Gjithashtu edhe në qendrat shëndetësore vijon po i njëjti proces”, tha fillimisht Manastirliu.
“Dje kanë mbërritur dozat e Pfizer, 7020 doza, ndërkohë që deri në 20 prill priten 22,230 doza. Dhe më tej përgjatë fundit të prillit dhe majit, vijon kontrata me Pfizer me dozat sipas planifikimit”, përfundoi fjalën e saj Ministrja e Shëndetësisë.
Kryeministri Edi Rama u shpreh se këtë javë ulet fasha e grup-moshës për vaksinim nën 65 vjeç. Që prej fillimit të vaksinimit, janë kryer në total 206.708 doza të vaksinës ndaj COVID-19. Procesi i vaksinimit po kryhet sipas të gjithë parametrave të sigurisë dhe cilësisë nga ekipe të trajnuara, në qendra të përqendruara dhe në qendra shëndetësore në të gjithë vendin dhe sipas kryeministrit Rama, i gjithë vaksinimi do të përfundojë brenda 14 muajve.
