Ajo është përfolur si një gjyqtare që ka sjellë probleme të mëdha si për subjekte private ashtu dhe për shtetërore me vendimet e saj të padrejta dhe herë-herë të mbushura me hije dyshimi.
Por gjyqtarja e Krujës, Enkelejda Hoxja, ka edhe mjaftë probleme të tjera pasi përflitet për lirimin me kusht të individëve me precedentë të larta penale.
Edhe më herë “Gazeta Reforma” ka denonsuar me fakte shkeljet e kësaj gjyqtareje, por sot ka qenë Inspektorati i Lartë i Drejtësisë, ai që ka kërkuar shkarkimin e gjyqtares Hoxha nga detyra.
Arguimenti për këtë ka qenë fakti për lirimin me kusht para kohe të dy personazheve të njohur të botës së krimit, ish-anëtarin e bandës së Durrësit, Endrit Doklen, Ilir Pajën apo Hekuran Billën.
Sipas raportit hetimor të ILD-së, gjyqtarja e Krujës ka dhënë 6 vendime në harkun kohor të maj 2017- nëntor 2019, që përbëjnë akte që diskreditojnë figurën e gjyqtarit.
Tashmë KLGJ do të mblidhet për të shqyrtuar këtë kërkesë të ILD, ashtu si në rastin e Markelian Kuqos, gjyqtarin e Korçës që liroi para kohe me kusht Gert Gjinararin.
ILD konstaton se gjyqtarja Hoxha ka kryer procese tërësisht të njëanshme teksa kujton se ajo ka gisht edhe në një vrasje të këtij viti, Hekuran Billës, të cilin e liroi edhe këtë para kohe me kusht dhe në fund u ekzekutua.
Në janar të këtij viti po ashtu ishte ministrja e Drejtësisë, Etilda Gjonaj që kërkoi ndjekje penale për gjyqtaren Hoxha pasi liroi me kusht para kohe ish-anëtarin e bandës së Durrësit, Endrit Doklen.
KËRKESA NGA ILD
Vrasja e shtetasit Hekuran Billa më 11 qershor 2020 e transmetuar nga media bashkë me të dhëna mbi gjendjen gjyqësore dhe lirimin para kohe të tij, e nga i njëjti magjistrat, lirimi para kohe me kusht edhe për të dënuar të tjerë si Ilir Paja apo Endrit Dokle, kanë bërë që Inspektori i Lartë i Drejtësisë të verifikojë, e më pas të nisë hetimin disiplinor me iniciativë ndaj gjyqtares së Gjykatës së Rrethit Gjyqësor Krujë Enkeleida Hoxha, për shkelje të rënda profesionale që diskretitojnë pozitën dhe figurën e gjyqtarit gjatë ushtrimit të detyrës.
Në raportin hetimor të ILD, që ka mbërritur në Këshillin e Lartë Gjyqësor, renditen argumenta se gjyqtarja Enkeleida Hoxha:
-Ka kryer shkelje të rënda profesionale, në funksion të zgjidhjes së parregullt të çështjeve gjyqësore penale
–Ka mospërmbushje të pajustifikuar të funksioneve gjatë gjykimit
–Veprime dhe sjellje që kanë sjellë përfitim të padrejtë për palët në një proces gjyqësor në kundërshtim me ligjin
-6 vendime të dhëna prej gjyqtares në harkun kohor nga maj 2017- shkurt 2019, përbëjnë akte që diskreditojnë pozitën dhe figurën e gjyqtarit
– Ka zhvilluar procese gjyqësore tërësisht të një anshme dhe në kundërshtim flagrant me dispozitat materiale dhe procedurale penale
Në raportin hetimor që ndodhet në KLGJ, konstatohet kryerja e shkeljeve disiplinore nga ana e magjistrates me dashje direkte, me pasojë lirimin e një të dënuari që përbën rrezik për komunitetin, nxiti akte me natyrë hakmarrje, që rezultoi me ekzekutimin e shtetasit Hekuran Billa, me pasojë të mëtejshme rrezikun që kjo sjellje e papërshtatshme e magjistrates, të ndiqet si shembull nga magjistratë të tjerë.
Bazuar në faktin që shkelja disiplinore në rastin konkret përbën “Shkelje shumë të rëndë disiplinore”, që diskrediton pozitën dhe figurën e gjyqtarit gjatë ushtrimit të detyrës, Inspektori i Lartë i Drejtësisë i propozon Këshillit të Lartë Gjyqësor që ndaj magjistrates Enkelejda Hoxha të jepet masa disiplinore “Shkarkim nga detyra”, e parashikuar nga neni 111 i ligjit nr. 96/2016 “Për statusin e gjyqtarëve dhe të prokurorëve në Republikën e Shqipërisë”,- i ndryshuar.
/GazetaReforma.com/
