Duke nisur nga e marta pasdite, pas disa ditëve me mot të ftohtë, në të gjithë vendin pritet një rritje e temperaturave me 7 gradë celcius.
Sinoptikani i Institutit të Gjeoshkencave thotë se vendi do përfshihet nga reshje shiu dhe dëbore në zonat malore ndërsa temperaturat do të kthehen në mesataren historike të muajit janar.
“Presim që të ndryshojë ndjeshëm gjatë pasdites së sotme me ardhjen e një mase ajri relativisht të ngrohtë që do të sjellë një rritje temperaturash prej 7 gradë në rang vendi. Ishte dita më e ftohtë. Në Korçë termometri zbriti në -14 gradë celius, në Peshkopi -12 dhe -8 në Kukës. Edhe në ultësirën perëndimore temperaturat ishin të ulëta -9 gradë jashtë zonave urbane dhe më të larta brenda zonave urbane, në Tiranë -5 gradë.”- bën me dije sinoptikani.
Temperaturat e ditëve të fundit nën mesataren e tyre historike nuk parashikohet të përsëriten më në vend.
