Kryeministri i Serbisë, Millosh Vuçeviç, ka dhënë dorëheqjen nga posti i tij pas një sulmi ndaj studentëve në Novi Sad.
Në një fjalim të jashtëzakonshëm për publikun, ai shpjegoi se kur mori mandatin nga Presidenti i Serbisë në fund të prillit të vitit të kaluar, ndjeu krenari dhe përpiqej të kuptonte përgjegjësinë që kishte. Ai ishte i vetëdijshëm për sfidat që Serbia po kalonte, si në rajon ashtu edhe në nivelin gjeopolitik, dhe e shihte qeverinë e tij si një qeveri të vazhdimësisë. Vuçeviç e theksoi se ishte krenar për arritjet e bëra deri tani.
Dorëheqja e tij erdhi pas muajsh protestash masive në të gjithë vendin dhe pas sulmit ndaj studentëve para zyrave të Partisë Progresive Serbe në Novi Sad.
Në fjalimin e tij, Vuçeviç tha se bisedoi me presidentin Aleksandar Vuçiç, i cili e pranoi vendimin e tij dhe argumentet për dorëheqjen. Ai shtoi se kishte marrë këtë hap për të ulur tensionet shoqërore dhe se sot do të dorëhiqej edhe kryetari i Novi Sadit, Milan Gjuriç.
Dorëheqja e Vuçeviçit erdhi vetëm një ditë pasi presidenti Vuçiç kishte shpallur nevojën për një “riformatim urgjent dhe të gjerë të qeverisë” pas kërkesave të studentëve grevistë të Universitetit të Serbisë.
Protestat në Beograd dhe qytetet e tjera filluan pas një aksidenti tragjik në nëntor në një stacion hekurudhor në Novi Sad, ku humbën jetën 15 persona. Protestuesit, përfshirë studentë, mësues dhe punëtorë të tjerë, kanë kërkuar përgjegjësi për fatkeqësinë dhe kanë ngritur shqetësime për korrupsionin në qeveri.
Në përpjekje për të qetësuar situatën, presidenti Vuçiç njoftoi një riformatim të qeverisë dhe theksoi nevojën për dialog dhe ulje të tensioneve. Ai po ashtu vuri në dukje se çdo krizë ka pasoja serioze për ekonominë dhe se situata aktuale nuk ishte e mirë për shoqërinë serbe.
Pas dorëheqjes së Vuçeviçit, edhe kryetari i komunës së Novi Sadit, Milan Gjuriç, njoftoi largimin e tij, duke u bërë një tjetër figurë politike që largohet pas presionit të madh publik.
