Ditën e sotme Kryeministri Edi Rama ka deklaruar se për socialistët bashkimi është më i rëndësishëm se sa rritja e çmimeve. Gjatë fjalës së sotme në Kongresin e PS-së, Rama tha se bashkimi në sjellje, kulturë si dhe vendimarrje është më i rëndësishëm se sa rritja e çmimeve, pasi bashkimi i rrit edhe çmimet. Ai gjithashtu ka theksuar se bashkimi i duhet më shumë vendit se sa çdo llogari që lidhet me para.
“Këshillimi Kombëtar është politikë bashkimi, jo ndarjeje. Këtë çështje dhe të gjitha çështjet e tjera i kanë të gjithë shqiptarët që kanë kursyer apo që kanë fshehur para për të mos paguar detyrime nga puna. Kjo është politikë me njerëzit, kjo është politikë për njerëzit, politikë familjare, kombëtare, e cila nënave me tre fëmije u jep një mbështetje të veçantë. Ndotësve të mjedisit të përbashkët u jep mësime shumë të merituara. Evazorëve të biznesit të madh apo autorëve të veprave te renda penale, u jep ndëshkime të vonuara. Ashtu sikundër u jep drejtim çështjeve të mbetura pezull në raport me ekonominë apo edhe në marrëdhënie me fqinjët e kësaj familjeje. Kjo është koha që Partia Socialiste të bëhet katalizatore e një bashkimi rreth vlerash që i tejkalojnë llogoret partiake, hendeqet e vjetra, maloret e kota që ia ngre këtij vendi në rrugë çdo ditë politika e konfliktit, e sherrit, e tërbimit.
Kjo është koha që Partia Socialiste të bëhet flamuri i një bashkimi vëllazërimi për sigurinë, përkujdesjen dhe zhvillimin e familjes sonë kombëtare! Kjo është koha që Partia Socialiste të bëhet hapësira e dëgjimit të ndërsjellë dhe e mbështetjes reciproke mes shqiptareve. Nuk kemi nevojë të presim një fatkeqësi, nuk ka nevojë të presim një termet tjetër, nuk ka nevojë të na vijë një pandemi, nuk ka nevojë të urojmë të vazhdojë lufta për të kuptuar se sa e rëndësishme është të bëhemi bashkë dhe se çfarë bëjmë ne kur bëhemi bashke. Ne këtë do ta bëjmë kulturë. Kulturë ne sjellje, kulturë në vendimmarrje, kulturë në veprim. Kjo i duhet sot më shumë se kurë Shqipërisë, kjo i duhet më shumë sesa çmimet. Më besoni, kjo i duhet më shumë sesa çmimet sepse kjo i zbut edhe çmimet. Kjo i duhet më shumë se sa çdo llogari që lidhet me para,” tha Rama.
