Skandali i shërbimit onkologjik në QSUT, alarmoi qytetarët dhe mediat por jo Qeverinë. Mjekë dhe infermierë të përfshirë në korrupsion kanë rrezikuar jetët e pacientëve, megjithatë Ministria e Shëndetësisë ka qëndruar në “hije” edhe këtë herë dështoi në punën e saj.
Ndërkohë që mediat, zbardhën të zezë mbi të bardhë përgjime dhe emra të përfshirë në këtë skandal, propaganda qesharake në qeveri vazhdonte. Faqja zyrtare e Ministrisë së Shëndetësisë kishte parësore publikimin e reklamave ndaj QSUT në rrjete sociale.
Ndërsa kreu i qeverisë Edi Rama, ishte i zënë duke menduar për flamengot në Rrushkull. Por më qesharak është vendimi i këtij të fundit për të krijuar DPAK vetëm pak ditë pas skandalit të bujshëm.
Dje, Këshilli i Ministrave u kujtua dhe miratoi ngritjen e Drejtorisë së Përgjithshme të Antikorrupsionit, (DPAK) që do vërë në “sitën” e hetimeve, administratën! Madje do ketë “hetues” në spitale, Kadastër, Dogana, Tatime e Postë.
Siç njoftohet DPAK synon të sigurojë parandalimin e goditjen e korrupsionit në institucionet e administratës shtetërore/entet publike/shoqëritë tregtare me kapital shtetëror. DPAK do të kryejë hetime administrative, për rastet e dyshuara si praktika abuzive ose korruptive.
Po ashtu, në rastet e hetimeve të thelluara, mund të kërkojë dhe ndihmën e ekspertëve vendas dhe të jashtëm të cilët duhet të ruajnë sekretin hetimor.
Pas pushimeve në Gjermani, tani justifikimi i skandalit në Onkologjik që la “me një këmbë mbi varr” qindra ndoshta me mijëra qytetarë të pashpresë, është ky vendim i ri. Qeveria di si të hedhë baltë mbi të vërtetën me propaganda e ligje që shkelen hapur.
Në rastet e hetimeve të thelluara, për shkak të njohurive të veçanta që kërkon hetimi ose verifikimi i një çështjeje, në grupin e punës së DPAK-së mund të përfshihen edhe ekspertë të administratës shtetërore dhe/ose ekspertë të jashtëm.
“Në rastin kur është e nevojshme përfshirja e ekspertëve nga administrata shtetërore, drejtori i Përgjithshëm i DPAK-së paraqet kërkesën pranë institucionit që mbulon fushën përkatëse për vendosjen në dispozicion të ekspertit/ekspertëve, i cili/të cilët kanë kualifikimet e cilësitë e kërkuara për kryerjen e hetimeve.
Titullarët e institucioneve duhet të vendosin në dispozicion ekspertë nga administrata shtetërore, të cilët përmbushin kriteret përkatëse. Ekspertët e administratës shtetërore e ushtrojnë veprimtarinë e tyre nën drejtimin e drejtuesit të grupit të hetimit të thelluar, sipas përcaktimeve të urdhrit të drejtorit të Përgjithshëm të DPAK-së dhe brenda afatit të përcaktuar në këtë urdhër.
Ekspertët e administratës shtetërore dhe ekspertët e jashtëm, të angazhuar në hetime të thelluara sipas përcaktimeve të këtij kreu, nënshkruajnë deklaratë konfidencialiteti” thuhet në pikat 10, 11, 12, 13 të këtij vendimi”, thuhet në njoftim.
Për rastin, Gjykata e Tiranës bazuar në të dhënat operacionit, dha masën arrest shtëpie për Edmond Gashin, mjek në onkologjik i cili ka lidhje me një klinikën private, ku thuhet se transferoheshin pacientët. Po kështu, është lëshuar detyrim paraqitjeje për mjeken onkologe Alketa Pere dhe ish-zv/drejtoreshën e QSUT-së, e cila mbulonte shërbimin onkologjik në atë periudhë dhe dy persona të tjerë, të cilët merreshin me koordinimin në shërbimin onkologjik
