Edi Rama foli edhe për çështjen e naftëtarëve sot në Opinion. Ai u shpreh se kompaninë që ka mbyllur rafinerinë dhe ka lënë naftëtarët pa rroga, e kishte ftuar vetë duke i parë seriozë, por tani u shpreh se shteti nuk ka asnjë ndikim tek kontratat që kanë naftëtarët me kompaninë private.
“Unë e di sa afër i kam ndenjur atyre naftëtarëve. Në fakt, ai është aset i bankës. Naftëtarët janë viktima të një privatizimi kriminal të bërë në kohën e Bashës dhe Saliut. Rafineria është e bankës. Unë kam lutur investitorët të vijnë, dhe kam shkuar me amerikanët që erdhën. Filloi puna e investitorëve, në një moment nuk u dilnin llogaritë dhe e lanë. Erdhi dikush tjetër, bëri ç’bëri… Rafineria u ndërtua për të përpunuar naftën e Patos-Marinzës. Investitori që e nxirrte, e çoi në treg, dhe nuk ia jepte rafinerisë. Nuk kishte naftë aq të mjaftueshme për të mbajtur të gjithë rafinerinë me punë.
Iu luta atij të Azerbajxhanit, kam dhënë dhe garanci 5 milionë euro dhe nuk vijnë. Ku është problemi tani? E kuproj që është çështje sociale dhe kjo është situata. Është një marrëdhënie kapitaliste e puëns, jo komuniste. Ata janë paguar në periudhën e karantinës, si gjithë të tjerët.
Ua kemi propozuar të kenë një pagë sociale nga shteti sa kemi mundësi. Merremi çdo ditë me këtë punë. Por, nuk e kuptoj pse futen në grevë. Në grevë futesh që të të dëgjojnë. Nuk i ka dëgjuar njeri ata tjetër si unë. Unë nuk kam një çelës magjik tu jap zgjidhje. Po përpiqem çdo ditë, në telefonin tim do gjeni sa komunikime në ditë bëj unë për ata. Jemi duke u përpjekur ta zgjidhim këtë punë. U bëj thirrje të dilni nga greva. Unë e kam në fokus çështjen e tyre. Ata të shkojnë në shtëpi, dhe ne jemi në punë për ta.” – tha Rama.
/GazetaReforma.com/
