Integrimi i Shqipërisë në BE “është e rëndësishëm për Ballkanin Perëndimor dhe për BE-në”, deklaron Komisioneri për Zgjerimin dhe Fqinjësinë e Mirë në BE, Oliver Varhelyi. Ai shprehu sot zhgënjimin që në takimin e ministrave të Çështjeve Europiane, nuk u arrit të ecej përpara me kornizat negociuese me Shqipërinë dhe Maqedoninë e Veriut.
“I zhgënjyer që nuk mundëm të ecim përpara me kornizat e negocimit me Maqedoninë e Veriut dhe Shqipërinë, por shpresoj që në një periudhë shumë të shkurtër kohore do të jemi në gjendje ta bëjmë një gjë të tillë. Ne kemi nevojë ta tejkalojmë shpejt ngërçin”, u shpreh ai.
“Me metodologjinë e rishikuar dhe planin Ekonomik e të Investimeve ne kemi një dritare unike mundësie për ta shtyrë rajonin përpara dhe për të arritur rezultate të prekshme. Ne do të vijojmë të punojmë për këtë qëllim”, theksoi Varhelyi.
Po sot, 24 eurodeputetët nënvizuan përpjekjet e gjithanshme në reforma në Shqipëri, në mënyrë të veçantë në fushën e drejtësisë, gjatë viteve të fundit, sikurse vlerësohet edhe në vlerësimin e Komisionit Europian. Ata nxitën Këshillin të miratojë kornizat negociuese për nisjen e negociatave të anëtarësimit me Maqedoninë e Veriut dhe Shqipërinë dhe të ndalojë shtyrjen e metejshme te bisedimeve të pranimit në BE.
