Kanë kaluar dy vite nga protesta e studentëve në dhjetor të 2018-ës dhe nga atëhere disa nga figurat e njohura të protestës me sa duket kanë ndryshuar mendim për partitë politike dhe kanë vendosur t’i bashkohen në fushatë dhe në struktura.
Janë pikërisht kryetarët e Këshillave Studentore ata që kërkonin me ngulm apolitizimin e protestës dhe sot janë në takimet elektorale që mban Partia Demokratike.
Kanë qenë vetë këta studentë që kanë publikuar në rrjetet e tyre sociale foto krah figurave të njohura të PD, madje disa prej tyre kanë marrë edhe pozita drejtuese në strukturat rinore të demokratëve .
Një nga studentët që ka rënë më shumë në sy gjatë protestave ka qenë edhe Klajdi Bello, që mbante një kasketë biçiklete e një flamur shqiptarë duke bërë thirrje për bashkim e duke kënduar këngë patriotike.
Sot personi në fjalë është kryetari i Forumit Rinor të Partisë Demokratike në degën 14. Këtë e ka konfirmuar ai vetë me fotot e postuara.
Një tjetër student që me agresivitet kërkonte laegimin e partive nga protesta ishte edhe Xhuljan Guçe, kryetar i Këshillit Studentor të Fakultetit të Shkencave të Natyrës. Guçe sot është kryetar i Grupimit Rinor Universitar Demokrat në varësi të Partisë Demokratike.
Nuk ka asgjë të keq të angazhohesh në politikë, madje kjo është ajo që duhet të bëjnë sa më shumë të rinj në ditët e sotme. Më e turpshmja është të fshehësh angazhimin tënd për qëllime përfitimi. Në interes të Partisë Demokratike, këta të ashtuquajtur studentë, përfituan nga protestat për t|u katapultuar në poste politike. Madje kanë qenë Këshillat Studentorë, të kapur nga partitë politike ata që kanë nxjerrë kërkesa e kanë bërë pakte në emër të shumësisë së studentëve.
Studentët do të dalin një ditë sërish në protesta, kjo është e pritshme, por nëse dalin duhet t’i largojnë personat që tentojnë të përfitojnë nga qëllimet e tyre të drejta.
