Ish-ministri i Mjedisit Lefter Koka, është arrestuar para dy ditëve për akuzat shpërdorim detyre, pastrim parash dhe korrupsion.
Sipas SPAK-ut, Koka ka abuzuar në çështjen e inceneratorëve, ndërkohë që sot ish-ministri ka mbajtur një qëndrim mohues ndaj 3 akuzave që rëndojnë ndaj tij në lidhje me çështjen e abuzimit me inceneratorët.
Janë zbardhur nga “Ballkan Web” detaje nga seanca e sotme gjyqësore, ku Kokës do t’i komunikohet edhe masa e sigurisë. Ai ka pohuar para togave të zeza se ka zbatuar vetëm ligjin. “Kam zbatuar ligjin”, mësohet të jetë shprehur Koka.
Kujtojmë se në kërkim janë shpallur biznesmeni Klodian Zoto dhe Stela Gugallja. Ndërkohë që ditën e sotme nga seanca plenare deputetja e Partisë Demokratikë, Jorida Tabaku u shpreh se Koka është përgjegjës për çështjen e inceneratorëve, por sipas saj nuk është i vetmi.
“Koncesioni i incneratorëve ka njerëz me pushtet, me para të pista, ka biznesmenë në lidhje me politikanë të korruptuar. E gjithë skema e inceneratorëve nuk është gjë tjetër veçse një hartë e krimit të organizuar. Lefter Koka është përgjegjës, por jo i vetmi. Ai nuk mund t’i bënte dot këto i vetëm. Duhet të ishte dhe deputeti Alqi Bllako, ashtu sikurse duhet të ishte Arben Ahmetaj. Mjafton të kujtojmë se Damian Gjiknuri ka qenë edhe ai i përfshirë. Askush nuk harron se si kryeministri doli personalisht këtu dhe në çdo media për të mbrojtur aferën. Grupi parlamentar shkoi në atë që sot është një skenë krimi, inceneratori i Elbasanit. Po kuptojmë se paska edhe hajdut 2 metra. Duhet të ishte i gjithë grupi përgjegjës për vjedhjen e 430 milion eurove. Sot duhet të ishin para drejtësisë edhe kryetarët e bashkive. Inceneratori i Fierit ka marrë dje 500 mijë euro nga Thesari. Ka njerëz që kanë sulmuar fizikisht deputetë të PD”, -u shpreh Tabaku.
