Kryeministri Edi Rama ka paralajmëruar sot një plan të ri masash për parandalimin e përhapjes së koronavirusit.
Shefi i qeverisë tha se pas orës 18:00 të ditës së sotme, do të ndalohet edhe lëvizja e këmbësorëve.
Që nga dita e nesërme për ata që lëvizin nëpër parqe apo ambjente të hapura, do të aplikohen edhe gjoba.
Rama në një postim të pak minutave më parë, bëri me dije, se qeveria po përgatitet për ndalimin total të pensionistëve.
Kreu i ekzekutivit tha se shpezat ushqimore, duhet të bëhen nga fëmijët ose nipërit e tyre.
Për ata që nuk i kanë nipërit dhe fëmijët afër, Rama tha se do të shërbehen nga shteti përmes skuadrave të bashkisë dhe qeverisë.
Postimi i plotë
“Po përgatitemi për ndalimin total të daljes së pensionistëve nga shtëpia, deri kur kjo luftë të mbarojë! Nuk mund të presim më ndërgjegjësimin e asaj pakice që vazhdon sfidon rregullat, duke vënë në rrezik shumë serioz veten dhe të tjerët! Pensionistët kryefamiljarë në qytete duhet të shërbehen me vajtje-ardhjet për shpezat ushqimore dhe farmaceutike nga fëmijët e tyre. Ata që nuk i kanë fëmijët në të njëjtin qytet, do të shërbehen nga shteti përmes skuadrave të përbashkëta të bashkive dhe qeverisë! Të gjitha bashkitë në bashkëpunim me ministrinë e shëndetësisë e mbrojtjes sociale, institutin e sigurimeve shoqërore, shërbimin social shtetëror dhe agjencinë kombëtare të teknologjisë së informacionit, janë në punë për planin e mbështetjes në shtëpi të pensionistëve kryefamiljarë në çdo qytet! I lutem çdo biri dhe bije prindërish të moshuar, bëni të pamundurën të mbani në shtëpi babain e nënën tuaj, gjyshin e gjyshen e fëmijëve tuaj! T’i lesh të dalin është njësoj si t’u hapësh derën të shkojnë për të marrë pjesë në një bombardim! O zot çfarë sikleti ta thuash: mos u jepni dorën dhe rrini tek dera në distancë kur u çoni ushqimet apo ilaçet në shtëpinë e tyre më vete! Kudo ku e keni të mundur në shtëpitë tuaja, mbajini në dhomë më vete! Që t’i përqafojmë fort nesër dhe t’i kemi sa më gjatë pranë nesh, duhet t’i izolojmë sot nga çdo kontakt i mundshëm, me botën po e po, por edhe me vetë ne! Ndjesë 1.000.000 herë🙏🙏🙏kjo ishte më e vështira që duhet të nxirrja nga goja dhe s’do doja kurrë të isha unë që duhet ta bëja këtë, por s’kam si ta mbaj për vete, s’ska asnjë rrugë tjetër! Kur themi frikë jo, kujdes po, fjala kujdes në këtë luftë ka fytyrën e prindërve tanë!”
Aktualisht në vendin tonë numri i të prekurve nga koronavirusi ka shkuar në 51, ndërsa është regjistruar edhe 1 viktimë.
Autoritetet bënë me dije se nga 20 pacientë që ndodhen tek Infektivi, 3 po mbahen në terapi intensive.
