“Inceneratorët i bëri Rama, 5D është vepër e Veliajt”/ Ahmetaj: Ditën që doli urdhër-arresti për mua, Erioni hapi shishen e uiskit me drejtorët

Arben Ahmetaj ka drejtuar akuza të forta ndaj Edi Ramës dhe Erion Veliajt për dy prej dosjeve më të bujshme të viteve të fundit, inceneratorët dhe çështjen “5D”. Ish-zëvendëskryeministri deklaron se përgjegjësia për inceneratorët i takon Ramës, ndërsa “5D”, sipas tij, është “vepër e Veliajt”.

Ahmetaj pretendon gjithashtu se në ditën kur ndaj tij doli urdhër-arresti, Veliaj festoi me drejtorët e tij duke hapur një shishe uiski.

“Nuk kam qenë asnjëherë as autoritet kontraktor, as vlerësues, as tenderues për incenetarorin e Elbasanit. Nuk kam bërë asnjë tender në jetë. Janë 17 vendime fap e fap. Pse më akuzojnë për korrupsion? Inceneratorët i ka bërë kreu i organizatës. Ai donte kokë turku.”

Me termin “kreu i organizatës”, Ahmetaj i referohet Edi Ramës. Sipas tij, përfshirja e emrit të vet në çështjen e inceneratorëve ka shërbyer për ta kthyer atë në “kokë turku”, ndërsa përgjegjësitë reale duhen kërkuar tjetërkund.

Por deklarata më pikante e Ahmetajt lidhet me Erion Veliajn.

“Është fakt që Erion Veliaj, ditën që ka dalë firma e arrestit për mua, ka hapur një shishe uiski me drejtorët e vet, të cilët i bëri të gjithë koka turku sepse “5D” është vepër e Veliajt. Këta do festonin, Erioni do hapte shishe tjetër nëse do shkoja në burg.”

Në pak fjali, Ahmetaj ndërton kështu dy akuza paralele: pretendon se Rama e përdori atë si “kokë turku” për inceneratorët, ndërsa Veliaj bëri të njëjtën gjë me vartësit e tij në çështjen “5D”.

Ish-zëvendëskryeministri këmbëngul se nuk ka zhvilluar tenderë dhe nuk ka qenë autoritet kontraktor apo anëtar i strukturave vlerësuese për inceneratorin e Elbasanit. Mbi këtë bazë ai kundërshton akuzat e ngritura ndaj tij dhe kërkon që përgjegjësia të ndiqet te vendimmarrësit që ai konsideron realë.

Deklaratat e Ahmetajt për përgjegjësinë e Ramës dhe Veliajt janë qëndrime dhe akuza të tij. Po kështu, pretendimi se Veliaj hapi një shishe uiski për të festuar daljen e urdhër-arrestit ndaj Ahmetajt nuk shoqërohet në këtë pjesë të intervistës me prova të paraqitura publikisht.

Megjithatë, Ahmetaj e formulon akuzën pa ekuivok: “Inceneratorët i ka bërë kreu i organizatës” dhe “5D është vepër e Veliajt”.

Kjo ngre edhe pyetjet që ai kërkon të rikthehen në qendër të debatit: Kush mori vendimet për inceneratorët? Cili ishte roli konkret i secilit institucion dhe zyrtar? Dhe në rastin “5D”, a mbaron përgjegjësia te drejtorët e Bashkisë së Tiranës apo duhet kërkuar edhe në nivele të tjera të drejtimit të institucionit?