Banesa në Durrës e deputetit socialist, Spartak Braho, po ruhet 24 orë nga efektivë policie.
Këto masa u morën pas publikimit të ngjarjes, se dy djemtë e tij Kreshniku dhe Arbri, janë kërcënuar me jetë, shkruan “Faxweb”.
Ishte ish-kryeministri Sali Berisha, ai që publikoi për herë të parë lajmin se djali i Brahos është kërcënuar në Durrës me qytën e pistoletës.
Pas denoncimit të ish-kryeministrit, ngjarja është konfirmuar edhe nga policia.
Në njoftimin e parë, inicialet e policisë nuk përputhen me ato të publikuara nga ish-kryeministri.
Në denoncimin e Berishës thuhet se është kanosur një person me iniciale K.B, ndërsa djali i Spartak Brahos quhet Arbër Braho.
“Durrës/ Specialistët për Krimet në Komisariatin e Policisë Durrës kanë shpallur në kërkim dhe po punojnë për kapjen e shtetasit L.K., 26 vjeç, banues në Durrës pasi për motive të dobëta dyshohet se ka kanosur me armë zjarri dhe i ka thyer xhamat e 2 mjeteve shtetasit K.B., 35 vjeç, banues në Durrës. Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale ” Kanosja “, ” Shkatërrimi i pronës ” dhe “Mbajtja pa leje dhe prodhimi i armëve , armëve shpërthyese dhe e municionit” parashikuar në nenet 84, 150 dhe 278 të Kodit Penal”, thuhet në njoftimin e policisë.
Më pas njoftimi i dytë i policisë të çon në përfundimin se Arbri ka shkuar për t’u hakmarrë, ndaj autorëve të atentatit ndaj vëllait të tij, Kreshnik Braho.
“Durrës/Më datë 19.08.2019 filloi procedimi penal për shtetasin A.B., 38 vjeç, banues në Durrës, sepse më datë 18.08.2019, në lagjen Nr. 4 Durrës, pas një konflikti për motive të dobëta ka goditur me sende të forta shtetasit A. K., 58 vjeç, dhe L.K., 30 vjeç duke i shkaktuar dëmtime trupore. Neni 89 i K.P”, thuhet në njoftimin e dytë të policisë.
